Pumoporma na ang mga kandidato
nagpapakilala na sa mga tao
pati ang ilan sa mga pulitiko
na nasangkot na sa mga eskandalo
umaasa pa rin silang iboboto
ng mga botante nilang maloloko
Ang mga ARTISTA na sumikat noon
ACTION STAR man yan o MATINEE IDOL
ay lumahok na rin para sa eleksiyon
na gaganapin sa susunod na taon
di lang kongresista ang ina-AMBISYON
kung di maging isa sa mga SENADOR
Ang mga PARTY LIST dumami ring bigla
na parang KABUTE sa mga tumana
katulad na lamang nitong si DIWATA
sa pulitika ay biglang pumagitna
ang hangariin daw niyang nais isagawa
bigyan ng proteksiyon ang VENDOR sa bansa
Kaya’t marami ng mga gumigimik
na kumakatawan sa mga party list
sila raw ang mga natatanging tinig
lalaban para sa mga maliliit
ganyan ang katagang laging sinasambit
tulad ng HONEY BEE na ubod ng tamis
Mga pulitiko’y magaling mangusap
upang sa botante’y makapanghikayat
sino ba naman ang hindi magaganyak
sa mga pangakong dalisay at wagas
lalo na kung ito’y hinggil sa pag-unlad
na siyang inaasam-asam nating lahat
Alamin lahat ng mga kandidato
na mayroong mga nakabinbing kaso
partikular na ang mga pulitiko
na ayaw bumaba sa kanilang pwesto
mga KAPIT TUKO at naniniguro
na palaging sila ang nasa gobyerno
Sila ay hindi na dapat tangkilikin
na makapaglingkod pa sa bayan natin
sila yaong mga pulitikong sakim
sa panunungkulan ayaw ng bumitiw
itong POLITICAL DYNASTY sa atin
panahon na upang ito ay buwagin
