1
Karening gagawang dalan dakal la ring makayalak
ampon ding mipapaisip nung nanu la klasi utak
nung kapilan mamanuran karin la aplit patambak
karing e pa sirang dalang pemusbus da at pemakbak
nung inia ring motorista magkasakit lang lalabas
bukud king mibabara la as na pa king katalusad
2.
E ra namu inisip a itang tatambak dang gabun
king bulus na nitang uran mayayagas mu king danum
dilikadu karing saken lakuas na ring mangaragul
ustung e la mitambunan ding mangalalam a kulkul
nung e la man mitagilid king burakan mangabasul
magkang mituag la pa ketang karelang pangabakulkul
3.
King kakaba ning kaledo oba’t e ro karin gawan?
maliswas lang papagawa nung kapilan mamanuan
Ot balamu daig do pa ring lipang a kaisipan
king malabsa rang dikarti lalto na lang pikatulan
O mekad sasarian da ing makaniang kararaptanan
ban kanita dumobli ing karelang kapanakitan
4.
E ta naman sasalangsang king masampat a pruyektu
a makakayap king balen a dalan na ning prugresu
dapot nung king panaun na naman ning uran at bagyu
Ing pamipagawang dalan daig do pa ring malilyu
bukud king lulbat ing obra na karagul a perwisyu
karing dakal a magbiyahi lakuas na ring magmanewu
5.
Ding timbakan da pang dalan ustung disan no ning albug
apakikabas meng myuman king kalame tibuk-tibuk
nung mangangas kang maglakad e ka maybug mang mikimut
uling ding adwa mung bitis akakua rang mibabakut
agiang ing kekang telasan dinalan yang metru laut
kasaka mu daig me pa ing sinarul kang kalublub
6.
Lakuas na nung daramulan de ring mangaragul a trak
ala neng kealiwan king pilabakan ding damulag
nung atin kang bining pale tamnanan me king libutad
bayu mayari ing dalan mekad atin nakang abias
ustu namang memanlag na at mesyas na itang burak
mengari yang bikwal-bikwal a bulan king banwang matas
7.
Kalabas na ning pabanwa retang dalan a megawâ
pamusbusan da no naman neng dakal no naman sirâ
at pablasang magtipid lang matiryalis nung inia sâ
na lang kababa kalidad maina la pangagawa
Ing metung pang kamulangan a gagawan ding aliwâ
Ing pamipagawang tete agiang ala namang sapâ
8.
Inia DPWH, ba da kayung e pagsisti
alilan at bayuan yu na ing malabsa yung diskarti
e la bulag ding memalen king ban e ra akit deti
king karelang panimanman itang sablang malilyari
panupaya yo ring tau nung atin la mang asabi
laban king kekayung dapat uling e la rugu pipi
