NAPUN king bayat ning papil mung gimpanan
Ing bie mu teya mung alang picacunuan;
Nanu’t ing panganib e mu man picabiang
O pengilag ing bie maliaring masintang,
Ya’sang managumpe gintu mung parasan?
Atin pa mo cayang mibait anti’ca,
Qng uli ning balen itaya na’ing bie na?
Upaya’t sicanan na ning dictaduria,
Ica ing matatag a tinutul queta;
Nung inia uli mu, miuman miticdo ya
O sinubling mebie…mete democrasia!
Ninoy, king uli ning daya mung misaluac
Carin qng MIA niang beril da ca’t sucat
Ding miyatasan ban sagana at dacap;
Catlu pang balitang ning eran paculdas
King seken mung karin America ibat,
Ding keca bignus da mapali lang balas
A migsilbing mitsa banting micalucu
Ing muang macasimpan busal tamung salu
Laban qng dictador a meging palalu
King cayang upaya’t buri na ya namu
Ing talan king timun ning sakim a balu
A picabaluan qng taguri nang “Apu”.
King uli mu, Ninoy bista’t ala na ca
Ing pekilaban mu e pa mitda baya,
Nung iniasa’t iniang e no’ pin mibata
Ding melacuan a makipaglaban pa,
Capamilatan ding sadiang galame na,
Bibu re ing ‘People’s Power’ karin EDSA
Ding micalu-calu king meto’ parasan
At misanmetung king metung a kimutan,
Ban ing demokrasia abawi reng miuman
King gamat ning atiu carin Malacaniang;
A nu’y Fidel Ramos at Enrile ilang
Menimuna caring mitipun king dalan.
At nu’ iniang e ne mingutngut keng sindac
Ing lider a medyu sira na pamalac,
E binang meluat o mapilan mung oras
Deti palihim lang tiniplad, tinacas;
Dela ra’ing agyu rang bitbitan king gamat
At malalagua lang minta lipat dagat.
Oyan ing binunga ning sakripisyu na
Ning bayaning Ninoy at teya na keca
Indung Pilipinas ing solung inawa
At marangal nang bie ban mitimawa ca;
(Ninoy, pilan la cayang anti keca,
Ing itaya ra’ing bie para king balen da?)
