AT NUNG atin la mang
Bubusbus canitang ya’pang macalucluc,
Ya’ytang king RCA,
A nung nu’re ngara dimanda na cabud;
Abias ning gubyernu
Gewa nang otsenta sentimus ing salup,
King agia mang iti
Inangkat da yatang migit nang mamesus;
Nanung pekibat na?
Burian ku pa nganang king suculan lungub,
Kesa king akit cung
Ding cacung memalen mate la keng danup;
Bilang Presidente,
Tungculan cu ngana itang magdesisyun
Dikil king nanu mang
Bage mangailangan malaguang atensyun;
Obat e cu yutus
Ibenta nang mura ning Administrasyun,
Ngening ding memalen
Atilu reti king gipit a situasyun?
Nung para mu cacu,
Ipamie cu namu ngana pang tinuglung
Nung yang ipagcalam
Ning calma cung mayap king tacdang panaun.
Angga na king miras
At mepupus ganap ing keyang tungculan,
E ya meging ‘corrupt’
Ing lagyung DIOSDADO PANGAN MACAPAGAL,
At waman ala yang
Manhattan, Mansion at saku-sakung dolyar
A macapanilas
Caring mangaragul a Bangku Switzerland,
Ya e sinalicut
O meculung uli ning capanecasan,
Uling e mig-imbut
Magpaca-cualta king e na pipawasan.
Inya naman angga
Na king dinulung ya king marimlang aun,
E mebawas ditman
Ing sablang capurian a keya miputung;
Pablasang balu nang
Mistula ning Balen king y Apung Dadong
Kikilalanan de
Gelingan pati na king aliwang nasyun,
A sucat ibilang
Caring mayap diling linucluc Pecapun,
Ning insa’ mang lipi
Keng cayapan talan at mugit keng Timun!
Iti, macuyad yang
Talambie ning meging mapuri nang anak
Ning balen tang’ tibuan
A sale ning santing, ning leguan at tindag;
Yan king capilan man,
Keti Capampangan larawan yang maslag
A e na mabating
A kislap nung wari king Tala ning Munag;
Modelu yang sukat
Taluntunan king bie ing dalan nang dilpac
Ban bucas, macadua
Atin pang anti’ya a lunsut king labuad!
