ning Provincial Language Council, isipan ku
Sabing Kapampangan, magambul neng ustu
at yan apalabung ta’yang pasibayu.
At e na manganib kabud na mawala
king pautik-utik king danggut tang dila,
ngening ding kaniti a migmunikala
atin lang masabal king manang salita.
Mika-opisyales a mibubu banting
mangasiwa king mesabing ‘Language Council,’
Nung nu’ i Mrs. Cruz na ning Holy Angel
(University) ing mipuk antimong ‘Chair’.
Basi karing mepikayaring tiuntiunan,
ing ‘Chair,’ ing Kalihim at ding aliwa pang
miyalal antimong Tesorero bilang,
deti tidua la mung banua manungkulan.
Primerung aldo na ning pamagmasusi
king amanung sisuan, at aldo mepili
ban ing katutubung Salita ning lipi,
ing maging sentru ning tulang e matati;
Mangasanting a programa ing metañgal,
mika-parada at ding sablang ginusal,
keng pamipatindag king Amanung Sisuan,
king okasyun a ita makusuelu la ngan.
Pero kadua, katlung banua kabud namu
merimla ing sadiang asna king kalagu
a pamisamak ding malugud susuyu,
king pamanang sabi a sisuan kang Indu.
Angga king ala nang merapat nanu mang
okasyun angga na ngening salukuyan,
At nu’ ing Pamuntuk e ku balung sabyan,
nung migdimitir ya king puestu nang telan.
O ating merapat mu mang ‘Exit Meeting,’
ala tang’ unabis abalitan karing
kayabe gugusal king mesabing Council;
(Tabalu mu nung king Holy Angel atin).
Ala kung intensyon a maging pamuntuk
ning Provincial Language Council, a nu’ bukud
mupin ding ngara ken posibling miluluk
antimong ‘Chair’ propesyunal la mu kabud?
Makanyan man agyang kwenta ‘salimpusa’
ing meging kabilyan mi ikeng aliwa,
Keng PLC – e mi kakawang bitasa
ikeng king AGTACA kayanib kukudta.
A nung nu’ kambe ring keng Aguman BUKLUD
kayanib gagambul, lilinang, sasaup
keng pamipalabung king Sabing memukud,
makasadya la namang mantabe lubus.
At ken ing Aguman da ring Talasulat
(Kapampangan) ampon ding keng lipat-dagat
e la pepatugut, masugid gugunyat
ban linangan karing gintu rang panyulat.
At sana pati na ring sablang Alkalde
karing sibabalen makiabe kaniti,
ban ing ume tanang malumpawing Sabi
akua nang masagip keng saup da reti.
At miuman sagiwa migit pa king sadia,
angga na king iti apalabung ta’ya
ampon king mabilug a bansa maniañga,
kapamilatan ding kekatang poesia.
At nung miras itang karing balang labi
ding memalen keti ganap yang misubli;
Yan, e ne manganib matda’t malumpawi
king kabilian niting ngeni talangkibi!
