LINAUT KU
Linaut ku..
Maplas man kening panamdam
Magdusa ka, magdusa ku, king kalma tang daralanan
King bie kung mipagkaitan
Mayap a kalmang panayan
Ban sanang ating ayampang, king kekang mal a kandungan
Para ding kekang pengari, tulutan da’ing kapalsintan…!
Linaut ku..
Ban sa’ng mayaplak ing dusa
Ing dusang kekata binye ning bigu tang pamalsinta
Nung ing pait yang kalma ta,
Yang migulis karin banwa
Maya’pa ing lumaut ku, e mu naku akakit pa
Ban keta tuknang lang lulwa, ding mapagal ta nang mata…!
Linaut ku…
Ban e muna sa akakit
Antimurin kaku sanang kalingwan ka king penandit
Angga man misna king pait
Ing lakwan kang magkasakit
Uli na nitang sumpa tang karing pusu ta midukit
Nung nu alang makapigil king lugud tang e mawaglit…!
Linaut ku…
Kening salu ku sinimpan
Bitbit ku ing pisumpanan kening pusu kung sugatan
Binubu ku king kaisipan
Ing aldo kekang panayan
Magbalik ku king bale yu, makayangat ya ing kanwan
Potang managumpe naku, aibie na ing kanawan…!
Linaut ku…
Iti ya ing kakung pake
Karin king aliwang lugal, migsikap kung mitmung tibe,
Uli ning pakeng dalise
Akamtan ku ing tagumpe
Dapot inyang magbalik ku, ing disnan ku misnang lumbe
Apat lang kandila detang, dadanglo king kekang bangke…!
Linaut ku…
Saken kea sana’ing panaun
Ban ayaplak kumu sana ing labis mung pamagmalun
Nung ikwa kumu sang memun
Asabing tinggap ing amun
Mekad ika, e ka ngeni, makaimle’t makadaun
Uli niti, batson mukung, kukuldas king kekang aun…!
Cris A. Gonzales
San Simon, Pampanga
1 Pebrero 2014 – 8:32 AM
Palmdale, California
