Abalitan ku ing kanitang atres ya
ning bulan a iti, ing aliwa pala
i Raja Soliman a kikilalanan da
ken king Macabebe bilang bayani ra
Nu’ne iti aparti yang indibidual
agpang king Komisyon na ken ning kekatang
ngara pin, Pambansang Pangkasalesayan
a pamuntukan ning meto’ matenakan
A nung nu’ iti ya kabud e aliwa
i Dr. Serena Diokno (ning Menila?)
ing ngara sinabing ing mesabing Raja,
aparti yang tau… kwestyonableng bagya.
At iting Komisyon Pangkasalesayan
ing opisyal a linarin keng bage yan,
king aparti ya pin i Raja Soliman
kening taung sukat mibie ing kapurian.
Kase ing minunang diling Filipinu
a mibuwis ing bie na keng pamakibunu
laban karing tubud nang Felipe’ng lilu
ya’y Raja Soliman agpang keng balu ku.
Pero lalto agpang king metung a libru
a sinulat nang Ian Christopher Alfonso,
ya ing mitagurian a “The nameless Hero”
a e mekilala man lagyu nung ninu?
I Robby Tantingco ning Unibersidad
na ning Holy Angel, a nu’ yang gaganap
bilang ‘vice president’ keng ‘external affairs’
at king CFKS, pamuntuk gugunyat
At keng anti kanyan o ‘commemoration’
a nu’y Dr. Diokno yang kwenta ‘chairperson,’
Has also launched a book, citing our very own,
hero, as the “Brave Youth of Macabebe” town?
Kastila lang tala-tangkap keng istorya
ding patutu inggil keng katapangan na
ning bayani tamung e man mekilala
ing tune lagyu… nu’ne king bansag da
A ngara pin kabud matapang nang anak
ning mesabing balen, at e papaysindak
busal ning mapali nang pamakilamas
laban karing daywan a keti migtangas.
At uli ning asne kanu pangaliksi
ampon matipunu ya pangalalaki,
keng awang, e man gumamit eran iti
akua nang mipanik nung lundagan ne’yti.
At nung waman iti dakal ya asawa,
kareti agyu nang gampanan karela,
ing obligasyun ning barakong antiya,
uli ning ganap ing pangalalaki na.
I Pedro Paterno agpang kang Tantingco,
ing ketang pang-labing siyam a sentenaryu,
ing keng ‘hero’ tamu memalagyu kanu
bilang Tarik, waman ala pang malino
Piyakitan, nung iti ya kabud aliwa
I Tarik o’ing ngara Soliman a Raja;
nu’ne itang kabud mu masasambitla
king ya ing ‘Anak ning Macabebe’ ata?
Inya naman ban ing debati mitakpan,
iting NHCP disisyunan na n’yan
ing lerawan niting ala yang lagyu yan;
Inya ausan ta’niang “Anak a Matapang”
Ning balen at nu’ king arap munisipyu
ning mesabing balen, iting ‘hero’ tamu
karin mayayakit ya’ing keyang rebultu;
Yan dangal a e na mabura king tau!
