KARING kandidatu nung akung mamili
E uling biasa ya’t dakal a salapi;
E king kalulu ya at kakung kauri
O kapatad ke’iti, kabalen ku’t lipi.
Ing pilinan kumu king balang partidu,
Maustang balu kung malinis a tau;
Uling nung ala mang apili tang’ Santu,
Mekad, atin murin namang e Dimonyu.
Ninu mang sumabing ding kapartidu na,
Pawa lang mangayap, iti malaram ya;
O king y Jesukristo, karing apostol na
Ating linto ilo a meging Judas da.
Kase, ing upaya kabud mipamisan,
King metung a kampu, matsura mu naman;
Uling pihung ila mung mikakapkapan
King nanu mang bage a e karampatan.
Inia masanting na itang e la miyabe
King meto’ partidu ding kailangan ike,
Uling kabud alang mitagan magbante
Napnapan de’ing kaha ding alang marine.
Inia’ing pilinan ku, e man tituladu
Dapot kapusu neng Andres Bonifacio;
Agiang kalulu ya, atin yang talino
Antimo y Lincoln, Cristo ra ding Negro.
Kabas nia naman sang’ Pedro Abad Santos
Lupa nang makualta, lebanan nong lubus
King pamamirait at pamamusabus
Karing anak-pawas, king dusa migapus.
At lalu keng buri nung tau yang biasa,
Antimo y Rizal, tapat neng telaga
Ing bie na’t kabiayan – makalag ya sana
Indung Filipinas, king panga-gapus na.
Inia nung sakali, karing magnasang den,
A ngara imbut dang sumuyu king balen,
E ta’ kararagli maniwala karen,
Kase neng eleksyon da ka balung lelen.
Pero nung ngana mo, yan pagsarian na ka
Kaibat ning alalan a menagumpe ya?
Mekad mu, agiang keng kayang opisina
E me akapkap yan kilub ning pabanua.
Inia nung ‘ting datang a maniawad botu
Kareng salukuyan a kakandidatu,
Iti, pagaralan ke pamu siguru
King bie nang miralan ban abalung ustu.
Nung abugadu ya, atin neng asaupan
Piglualu matulid a e ne beyaran,
Ning pakakalulung bait mu king ilang
O ning dimanda rang alang kasalanan?
At nung doktor neman, ikutang mu namo
Atin na yang dikil mapilan a aldo,
Kilub ning pabulan king ba’yang manulo
Karing kapus-palad a pakakalulo?
At maging nanu ya propesyon iti’nan,
Ala nang muna keng ing dapat tang’ yalal,
Ila kabud detang ‘ting tune pakamal
King Dios, king kaparang-tau at Balayan!
