NINUNG E MAKAKILALA kang Don Pedro Abad Santos
A kabilang karing liping king tepangan mipabantug?
At nu’ mas pinili na pa ing bie maybug mate danup
Kesa king timawang bili a kemulatan nang lubus,
King ba’nang apatpat keta ing sistemang e makatud
A kanita mengibabo king gamat ding propetaryus;
Keta a nung insanu ring king marangle e patugut
Ilang alang yuling pale king bale ra neng papalut!
Makanano, kulang namu ing e ra ngan soluan keta
Ding ganid a asyenderu itang pupul king gabun da;
At pablasang ma-prinsipyung tau ketang panaun na,
Ing “land reform”, ditak-ditak, pinla na ne kanita pa;
Pati social justice program ning Presidente kanita,
Ditman e na pitakutan pinintas arap ning masa;
Pikanlapan de y “Perico”, Sentral Luzon ding makualta,
Uli ning ukulan deti – iti suksuk ya karela.
Pablasang mibait ya man king dase ning kayatinan,
Y Don Pedro simpli yamu at alang ditmang ketasan;
Kaya ding pakakalulu, ilang dapat munang saupan
At sukat nang ipaglualu laban king e karampatan;
Nung iniasa’t keti Sentral Luzon ya ing mitagurian
“Champion of the Peasants” ngara at peka-founder na bilang
Ning “Socialist Party of the Philippines” king kabilugan.
Bilang abogadu, e la ditak kilub ning aldo-aldo
Ding kalulung ortelanu a pasaup kang Don Pedro;
Karin, a nu’ ding kasaup na lima lang abugado,
Dapot libri mu’ing serbisyong pagkalub na karing tau;
Misan ya pang babie kualta ban asaupan na lang ustu
Detang alang pilisunan king kalukan a masolu;
At keta nung ating datang a mamitbit sang’ rigalu,
Kemarailan, king magdala, ipauli namung pihu.
Y Don Pedro, makanian ya kasampat a pilubluban
At e ya migkait saup kenu pa mang mengailangan;
Nung inia king meging bie na, waman e’ibat king kalukan,
Birian na pa ing king paka-kalulu mu miglayunan,
Kabang king balen Minalin niti sindu ing kimutan
A belangkas deti laban king e ustung kalakaran;
Angga na king mirate ya king dase ning kakaluluan,
At isuku na ing sabla king Ginung Dios a Miglalang!
Pilan la pa? O atin pa kayang anti kang Don Pedro
A keta mas pinili nong’ pakiabayan ding kalulu
At den ipaglualu na la laban karing propetaryu
Kabang ya king keyang bili kabilang de reti mismu?
Inia nung ya kalupa ria ding karaniwan a tau,
Nanu’t e na king propesyon niti bilang abogadu
Ampon alang nanu pa mang liliwan king bie misentru
Ing pulayi na ning sabla king bayaning Fernandino?
A nu’ angga king panaun a’yti ala pang malino
Ulat a nu’ ing katawan nang gabun ning mal tang’ ‘hero,’
Milibing ya o ali king ‘public cemetery’ mismu
Ning balayan ning Minalin ketang panaun ning gulu;
Ulining pelalung bale o sintungan niting kubu
E ra balung ituldu ken o linawan nung insanu
King dane o sakup na ning barangay Sto. Rosario
Milibing ing bangkala ning matenakan a Don Pedro!
Marahil nung ing meging bie nang Don Pedro yang apusan
Ding keraklan a magnasang king gubyernu manungkulan,
Kakusuelu ring memalen lalu’t nung king Malakanyang
Ing milukluk kalupa ne prinsipyu at pilubluban;
Pablasang iting bayaning kekatamung parangalan,
King bistama’t makualta ya pemalit nang kakaluluan
Ing bie niti king maskup at mapanganib a kabilian
King ba’nalang asaupan ding makabasul king kalukan!!!
