Balen, nanung sangkan king paritak-ditak
Ing kekang Amanu king sadya nang tindag,
Anti keng akakit miuman mapapanat
Ngening ding tituk mu a sukat lumingap,
Migpabusta na la at e na gugunyat
King katungkulan a malugud dang tinggap.
Partikular na ken ing alal Pamuntuk
Ning Provincial Language Council a metudtud
A misna kanyaman king metung a suluk
Ning balayan at e bitasang kinimut
King dapat gawan na kaybat nang milukluk
E mu adwang banwang kabalwan nang lubus
Ing ya kailangan neng kuldas king tungkulan
Ban ding aliwa pa ila namang talan
King Timun ning bangka a sukat katigan
Potang matitiyab ya babo ning danuman,
Dapot angga na king migpagiwang-giwang
At ume nang lumbug e na ne detangan.
Inya banting iti e malaus mityab
King pamagpabusta at kealan lingap
Ning penibalan na ning Konsehung sukat
Sita king Pamuntuk, king e pamanupad
King obligasyun na, malugud ming yawad
King ‘Provincial Board’ ing mapalit neng agad
Ing kasalukuyan a Pamuntuk bilang
Ning Konseho na ning Amanu tang menan,
Ban e malumpawi at mate lubusan
Ing Salitang iti keti Kapampangan;
Antining ding sukat tamung panaligan
Kampante lang lukluk king metung a sidwan.
Kailangan pa wari ing gisingan ta’ya
King ba’nang dikilan ing katungkulan na?
Ngening pati na ring telanan dang pera
Ala lang malino tune kerasan da;
Y Anac ning Arenas a minye karela
Karing kualtang deti kaku mangutang ya.
Nung magkanu disan ing gastus da reti
Karing ‘stickers’ at ‘flyers’ dang sinabi
A pinaskil da ren malapit king Holy
Ampo karing aliwang iskwela pati;
Pribado, publiko king Angeles city,
Banting milaganap ing tungkul kaniti.
A pamipalabung king Salitang mana,
Kapamilatan ning pamipa-ulaga
Ampon matapat a pamangambul keya;
Pero dening sukat kanyan manimuna,
Antimo pin ining alal Pamuntuk na
Ning PLC – atyu pa keti Pampanga?
Intasang e ne pin bitasang mekikit
Karing kayabe na niting opisyales
King mesabing ‘Council of Provincial Language,’
A kabud-abud na biglang menahimik;
Nung den e no’ bisa ot e la makikit
King Capitol banting ing isyu mituklip?!
