Tama lang marahil at siyang nararapat
isagawa ni DILG Sec Roxas
laban sa ibang mga Alagad ng Batas
ang ‘lifestyle check’ at ‘strategy on tax’
Sa kanilang hanay na hinihinalang
malakas kumita’t madaling yumaman,
gaya nitong ibang mga Heneral diyan
na may mansion saka magarang sasakyan.
Gayong hindi naman anak ng maykaya
sa buhay ang ilan, at dating mapera;
Ya’y natural lang na nakapagdududa
kung yan ay sagana ngayon sa lahat na.
Kaya kayong may ‘illegal activities’
at nahirati na sa ‘monkey business’
ay maghanda-handa na sa ‘lifestyle check’
ni BIR Commissioner Kim Henares
At ni Interior Secretary Mar Roxas
na inaasahang ibubulgar lahat
ang may tagong yaman at ayaw iulat
sa kanyang SALN ang (kita sa di patas?)
Partikular na ang ‘high ranking officials’
na gumagasta riyan ng higit sa dapat
kitain niyan bilang isang otoridad,
kaya sa “lifestyle check” ay hindi ligtas
Ang may ‘illegal’ na kita o gawain
sa kung anong kanyang hawak na tungkulin,
Tulad na lang nitong PNP Chief natin,
na ngayon ay tila igigisa na rin.
Dahilan na rin sa mga natuklasang
magagarang bahay niya sa ibang lugar,
Partikular na ang mansion ni General
sa may San Leonardo ng Nueva Ecija riyan.
Di ko sinasabing galing sa ‘Hulidap”
ang ‘multi-millions of pesos’ nitong hawak,
Pero ano’t itinatago sa lahat
ni Purisima kung di galing sa sikwat?
At saka bakit di niya isinama
sa kanyang SALN ang lahat ng ‘assets’ niya
kung tunay ngang walang tinatago siya
sa mata ng bayan at lahat-lahat na?
Yan ba ang klase ng pinuno pa mandin
ng kapulisan ang dapat tangkilikin
at ayaw ni PNoy na siya’y sipain,
gayong wala rin siyang ginawang magaling?
Anong klase pati riyan ng ‘good leadership’
ang maa-asahan kina PNP Chief
Alan Purisima’t ibang opisyales
kung sila mismo ay may mga ‘malpractice?’
At sila na dapat ay maging huwaran
sa gawa at lahat ng mabuting bagay
ay sila pa itong kapural kung minsan
nitong pandaraya na di karampatan?
Kung kaya pati na matitinong pulis,
na tunay naman ding tapat at malinis
ay damay sa gawang di kanaisnais
ng ibang kabaro nilang utak ipis.
Sa puntong ito ay ninanais nating
kay PNoy ay lubos na maiparating
ang panawagan na sana ay sipain
na si Purisima sa kanyang tungkulin
At ang lahat na ng mga nagkasala
ng pangongotong at saka ‘hulidap’ pa,
ipakulong na at huag bigyan ng tsansa
na makabalik yan, pagkat marumi na.
At itong ‘lifestyle check’ na tinatawag
ay siyang patuloy na isagawa dapat,
nang sa gayon ang maruming aktibidad
na “monkey business” mawala na’t sukat!
