ITONG PATULOY na direktang pag-iwas
ng angkan ni PNoy sa mga marapat
sundin upang pati sila’y ipatupad
ang nasasaad sa batas hinggil sa CARP
Kaugnay ng napa-kalawak na lupang
sakahang pag-aari ng mga yan,
na hanggang ngayon ay ayaw pa rin nilang
ibigay ang para sa manggagawa n’yan
Na ipinag-utos ng Korte Suprema,
noong panahon ni Chief Justice Corona,
ya’y pagpapatunay na talagang sila
ay ayaw nila ng tunay na reporma
Sa asyenda nila kung kaya marahil
ipinasipa ni Pangulo ang ating
Punong Mahistrado sa nakararaming
mga mambabatas na madaling bilhin;
Kung kaya nga’t hayan ang kaawa-awang
mga magsasakang marapat mabigyan
ng lupa ayon sa pamalakad ng DAR
ay pinapaalis na ng sapilitan
Sa loob mismo ng Hacienda Luisita
sa pamamagitan ng pagsira nila
ng kanilang tanim na palay at saka
iba pang pananim na aanihin na..
kasama na riyan ang kusang panununog
sa kanilang dampa; at alagang hayop
na basta na lamang nila kinukuyog
hulihin at kinakatay pagkatapos.
Ya’y grabeng paglabag na sa karapatang
pang-tao ng mga inaabusong yan
ng mga pulis at umano’y militar
na itinuturong nasa sa likod n’yan.
Kung ang lahat ng yan ay sadyang totoo
at may kinalaman ang mga Aquino
sa nangyayaring yan sa asyenda mismo
ng kanilang angkan, tama lang siguro
Na mapangalanan nating kunsintidor
itong sa Palasyo nakaupo ngayon
pagkat ni hindi siya gumawa ng aksyon
para siyasatin ang napabalitang ‘yon.
Nanaisin pa pa ba niyang lalong dumami
ang mamamatay at masasaktan pati
sa mararahas na gulong nangyayari
na kagagawan ng mga ‘private army?’
Ng mga Cojuangco at Aquino na rin,
para lamang nila tuluyang mapigil
ang hindi malipad ng uwak na itim
na asyenda nila’y pira-pirasuhin
Nang naa-ayon sa panuntunang batas
ng lupang sakahan buong Pilipinas,
na malaon nang dapat maipatupad
ng DAR, pero sanhi nga nitong ang dapat
Manguna ay sila itong anhin na lang
yata nitong iba pa ay palihim nilang
itago sa mata nitong taongbayan
ang bagay na sila ang dapat tularan
Tulad halimbawa ng angkan pa mismo
ng ating butihing Pangulong Aquino,
na patuloy pa ring dinededma nito
ang utos ng dating Punong Mahistrado?
Yan sa ganang aming sariling opinyon
ay di lang tuwirang paglabag ni PNoy
sa ‘land reform law’ ang kanilang patuloy
na di pagtalima sa kautusang iyon!
