MAPILIT TALAGA na maipangalan
Ng ating butihing 1st District Congressman
Ang ngayo’y Clark Airport kay Cory, bagaman
Ito’y DMIA na dapat talaga yan.
At kay yumaong Diosdado Macapagal
Na ito noon pa napagkaisahang
Isunod ang dapat maging katawagan
Bilang pagkilala sa kadakilaan
Ng ‘Poor Boy’ ng Lubao na marapat nating
Ikintal sa isip, puso at damdamin
Bilang Kapampangan na tunay naman ding
Dangal nitong lipi sa husay at galing
Ng pamamahala, na di nabahiran
Ng anumang batik ang kanyang pangalan
Hanggang sa bumaba siya ng Malakanyang
At mamuhay bilang simpleng mamamayan.
Bakit kailangan pang kay Cory Aquino
Ipangalan nating mga Pampangueño
Itong Clark gayong may NAIA na tayo,
Na nakapangalan na nga kay Benigno?
Di pa ba sapat ang isang paliparan,
Na gaya ng dating MIA ay sa Tatay
Nina Nonoy at Kris na nakapangalan,
Kung kaya pati na itong DMIA riyan
Ay kay Ginang Cory Cojuangco-Aquino
Naisip ni Cong Yeng ng Unang Distrito
Nitong Pampanga na ipangalan ito,
Kung siya ay walang iba pang motibo?
Kung aniya ay di raw maapektuhan
Sa airport ang katawagang Macapagal,
Ya’y lubhang malayo sa katotohanang
Ito ‘y para lang sa ‘passenger terminal’
Na di tulad noong si Ginang Arroyo
Ang siyang nakaupo pa nating Pangulo,
Itong buong complex ng airport na ito
Ay DMIA na ang tawag natin dito.
At kung ani Guiao ay para protektahan
Sa pulitika ang airport na naturan
Kaya ang DMIA’y di isinulong n’yan,
Bilang pamalit sa CIAC, di dahilan
Para iwasan ang pamumulitika,
Sapagkat base sa isinusulong niya
Ay napakalinaw nating makikita
Na yan ay may kulay rin ng pulitika.
At maituturing din namang insulto
Kina Apung Dadong at Gloria Arroyo,
Na mapalitan pa ang DMIA mismo
Ng CAIAA sa panahong ito.
At para ano pa’t itong CIAC ngayon
Ay kinakailangang kay Ginang Corazon
Cojuangco-Aquino lubos maisulong
Na maipangalan gayong kay Pangulong
Dadong Macapagal na nga nakalaang
Maisunod dapat sa kanyang pangalan?
Yan sa ganang aking sariling pananaw,
Ay di malayong may bahid panliligaw
Kay Benigno III ang isinusulong
Ng ating mabait at butihing Solon,
Nang sa gayon habang Pangulo si PNoy
Ay nakasandal siya sa Administration?
