Ing pamagmasusi king talagang petsa
Ning pangadeklara ning Independensya
Ampon nung kaninu kareti talaga
Mangaintulid mibie ing pamangilala
Bilang bayani a sukat parangalan
Indat miras ing Aldo ning Katimawan,
Pablasang angga na ngening salukuyan
Yan binang malabug king kasalesayan.
Panaun na banting itulid ing mali
King meging papil da ring tune bayani
Ban keta ing sukat king libru mibili,
Ing makatud ampon alang pasubali.
Kalupa ning bili reting mesambitla
A nung kenu karen sukat mipagkala;
King tau Cavite o dagul Menila?
Ing talagang tutu, balamu milisya!
Pablasang malino keng kasalesayan,
I Andres Bonifacio ing tune mipundar
King kanita inaus dang Katipunan,
At ining Emilio sinake ya bilang.
Iniasa’t nung kenu kari Bonifacio
At Emilio sukat mibie ing kreditu
Ning Independensya, e pin ata ustu
Ing iti miputung kening Caviteño?
Kailangan mirinan pansin o ulaga
Pati nung insanu ing talagang petsa;
Uli ning Agosto beinte tres (23) ya ngara
Itang “Cry of Balintawak” a ausan da.
A nung nu’ iti yang ‘birth of our nation’
At umpisa ning mapaling rebulusyon,
A penimunan na ning tubu Masantol
Laban karing daywan a keti migsantung!
(At alang aliwa nune’y Bonifacio,
Nung inia pin mekad kening Aguinaldo,
Macabebe la ring dinakap siguro,
Uling kasaman de ining Caviteño?)
Tanggapan ta’na mong ining Aguinaldo
Kabilang da ne ring Presidente tamu,
Pero karampatan mu naman siguru
Mibie ing para kang Andres Bonifacio?
At mibilang e mu meging Presidente,
Nune pa naman ya ing primerung dili,
Pablasa ping iti aktual yang migsilbi
At e meging taksil king tau Cavite!
At simsam na yatang Emilio ing dapat
Mibie kening Andres a talagang sukat
Mirinan papuri at direktang tanggap
King rekognisyon a king aliwa miras.
Katutuan, ing mika “Tejeros Convention”
A nu’ mepisabi kareti nung ninung
Dapot manungkulan antimong peka-pun,
Pero mengibabo ing ‘home-town-decision’
At nanung paniambut nining Bonifacio
Laban karing Magdalo nang Aguinaldo?
Inia kemaulian ining rugung tau,
Pepapate re pa? (pati y Procopio)
Tanggapan ta’na ing Junio a dose ya
Ing kayaldawan na ning Independensya,
Pero nung ninu ing tune menimuna
At tinulu daya dinan tang’ulaga.
Inia panaun na karing mangagaling
A Diputado ken ing makapilub “bill”,
King i Bonifacio ing minunang diling
Meging Presidente – at aliwa ining
Lider ding Magdalo – a pasari namu
Ning pamilutlutan upaya – tinulu –
Ing dayang bayaning keta mesayang mu
King gutad a nung nu’ ing bie na mepugtu!!!
