King pangatalakad na ning City College
Keng kapamilatan nang Mayor Rodriguez,
Iti lalung pepalablab king interes
Ding ating tagimpan magyaring ‘higher grades’
Partikular na ring bait king kalukan
A’yanti na waring pane pagkaitan
Ban ibayu lupa ing bie rang biltangan
Ding kapus-palad a pengaring ibatan.
A e mirakayan masanting a kalma
Kekaban ding banwang milabas la pin sa’
Pero deti e ra tikman mang bitasa
Itang pamibie-bie a medyu manawa
Pablasang atiyu karing memagaral
Ing susi ban keta mipuk ya king dangal
At maging guebnan na para king kanawan
Ing edukasyon a binang makailangan
A nu’ balamu yang makarikil yamu
Ing bage yan karing makasakle gintu
Inya ing kalulu angga mu pin rugu
King lakuan dasan ne ning kalma nang bigu
At ding bait karing magkutsarang pilak
Ila mu bukud ding mirakayan pakpak
Ban apakirasan itang asna katas
A masulit kamtan ding bait king dayat.
Pero ngening atin nang magmalasakit
A’yanti kang Oca ban maulu ing sakit
Ning bigung tagimpan… oyan mayayakit
Miyatdanan lunas king ba’rang akamit
Ding pakakalulu ing tagimpan deti
A maging memalen lang binang masilbi
Kapamilatan ning edukasyon a iti
A e na masulit pagdulapan ngeni.
Pablasang manibat king ‘grade school’ la pa,
Iti babie na’ na pin karelang Oca,
Kapamilatan ding keyang pepagawa
A kongkretung ‘school building’ a mialiwa.
A nu’ alus balang barangay ning siyudad
Mika ‘high school’ na a sari kabikas,
Nung inya ding anak lalu lang sisipag
Magaral para king malagu rang bukas.
At bukas-makadua mibayu ing sabla
King bie biltangan da ding bait maluka,
Uling bukud mung ing edukasyon ata
Ing makapiblas king lupa ring aliwa.
At bukas-makadua ala namu namang
Tumulu lua uling e makapagaral,
Pasari namu ning pamasahi ra man
Madalas ali ne adinan ning Inang.
Pero yan e ra na pin problema ngeni
Ding alang gaukan a karelang pengari,
Kasi ding iskwela… uli ning Alkalde
Atilu ren mismu king barangay deti!
At e no dumayu ban makapagaral
Uling magumpisa king wambi o ‘grade I’
Deti atin na lang iskwelang piluban
Angga king dalpak lang sekondarya mu man
At nung imbut da ing magyaring kolehiyo
Ban lalung kayan ing karelang opisyo,
Ing City College yang pakibat a pihu
Karing magnasang ing lupa ra mibayu!
