SUBIC, Zambales –Dalawang sakay ng tricycle ang patay nang ang mga ito ay banggain ng isang kotse na minamaneho ng isang Belgian national sa kahabaan ng National Highway Barangay Sto Tomas, sa bayang ito.
Kinilala ni Senior Inspector Jelson Dayupay, hepe ng Subic PNP, ang mga biktimang sina Fernando Torres, 47, residente ng Purok 6, Roosevelt, Dinalupihan, Bataan at Jonathan Paguntalan, 28, residente ng Crisostomo St., Barangay Matain, Subic, Zambales.
Sugatan naman ang driver ng kotse na si Didier Ladiere, 56, Belgian national at residente ng No. 999 Cabangaan Point, Subic, Zambales.
Sa imbestigasyon ng pulisya, patungo sa kabayanan ng Subic si Ladiere sakay ng kanyang Porsche na may plakang ZD-7058 nang i-overtake nito sa “no overtaking zone” ang isang tricycle at mabundol ang kasalubong na tricycle na minamaneho ni Torres.
Hindi naman magsasampa ng reklamo ang pamilya ng mga nasawi matapos na lumagda ang mga ito sa “affidavit of undertaking” sa pamamagitan ng abogado ng suspek na si Atty. Minister Moises Du na sasagutin ang lahat ng gastos at pagpapalibing sa mga biktima.
