1.
E yu sa pu gaganakan
nung datang na ing panaun, kekami na kayu mamun,
ban keta king aliwang bie
lumipat na kayu’t dulung, matudtud na ketang aun,
ding kekami pepamanang
bining tilsak yu king gabun, king lininis yung minangun,
mamunga lang alang sala,
karing patak ding pawas yung penugtug yu king panaun,
kabang gagambulan yu ke
karing masampat a usuk king byung naman ning daluyun,
nung nukarin do aplitang
lalagasan ding bulung ning dutung a meina king ugun.
2.
Nung sakali datang na ing
panlako yu king masala, maglakbe na ko king dulum,
dalan yu lang kekong sulu
ding bunga da ring labi yung kapilan man e mitikum,
angga mang atiu na kayu
king tauli nang gatpanapun ning bie yu nang magpadulum,
e yu pikabyang ing pagal
’bat king abak anggang bengi payagus yu’ing mabie danum,
karing paligui ding diwang
minie kalam karing pusung mengau king pamiyagum,
makanian kaming mangakung
lakbayan mi ya ing dalan, itabi mi ing dalumdum.
3.
E ko sa pu malulumbe,
ing indu e mipaburen king kekayung pamaglakbe,
sesen mi yang anting sadya
kalupa na ning depat yung masampat a pamanese,
ban ing aklis king pusu na
a pigkalub at likwan da ring sapni nang mengawale,
mapawi ngang anting bula
ban ing paninap nang tula kaya miibie’t miyale;
at ding anak nang ginulut,
mengalingwan king indu rang pekyakan da’t maybug mate,
akwa milang aibalik
king bale nang kitmuan da king panangis at tagulele.
4.
Kekayung meging ibpa mi
a king indu minye saya karing penandit ning dusá,
idala yu king tudturan
ing matibe ming pangakung kaya ibie ing ligayá,
ing kaplas nang daramdaman
king sakit-lub a pigkalub ding binang mal a anak ná,
lunasan mi’t ipangakung
pawyan ing sabla nang dusa, pulisan ding lwa king matá,
ban misan pa mayakit ya
ing maluningning nang salang sunlag karin king alayá,
ning matindag a amanung
kapilan man e mabura king pusu da ring mal kayá.
5.
Pangaku ming kayanakan
keyang indung penibatan, ngeni at king kapilan man,
iti ing e makalingwan
king isip da ring anak nang king labuad na magkarinan,
itulid mi la ring dilang
mebaluktut king uli na ning mepirait nang leguan,
kanitang pinilit dalang
magsalita ring anak nang linili ra king katutuan,
detang minyira king mana,
karing mayap a ugaling pigkabye ra ding keraklan,
a ngeni papalitan da
karing dapat da ring daiwan a lubas king agisingan.
6.
Pangaku ming kayanakan
ikabus ya king palyasa ing amanu tang matatdâ,
ibalik ming malalagwâ
ing mewaglit nang lindayug karing pusu tamu’t diwâ,
ikami ing maging salâ
king dalumdum na ning bengi ning maybug mateng salitâ,
ban keta ing mal tang indu
a atiu dase ning sakit, anting bangke nang mistulâ,
mibalik na’ing sikana’na,
misan pa akit ing leguan kalupa na king samulâ,
kanitang ing amanu na
makaslag yang babie salâ karing anak nang dakilâ.
7.
Iti ing kekeng pangaku
kekayung atiu parating king siping mi mamalale,
e la mipaimburisan
ding kayawsan yung dinake at ding matning tagulele,
kabang karing katawan mi
ating mamagus a dayang karing uyat manalete,
isundu milang igale
ding dalit yu’t kawatasang misulat king sabing tune,
a tanda na ning dalise
amanung piglwalu ra ding bayani tang mengamate,
ban ing labuad a makule,
ing Kapampangan a mabye, kapilan man e ya mate.
PL Cris A. Gonzales
San Simon, Pampanga
