May nakaisip din sa‘ting mga Solon
Na isulong niya sa Kongreso itong
Napakagandang ‘Bill’ na napapanahon
At tunay naman ding napakahalaga
Para sa overseas workers at lahat na
Ng ating kabayan na dumarayo pa
Sa ibang bansa para lang sila kumita.
Kung saan tama at may pinipirmahang
Kontrata ang mga workers na naturan
Bago tumungo sa Saudi o saan man
Ay bale wala rin naman kadalasan.
Sanhi na rin nitong minsan sa Arabic
Nakasulat kundi man sa wikang English,
Kung kaya ang ating kawawang ‘Overseas
Workers’ sa puntong yan ang talo malimit.
Pagkat ng dahil sa pinapirma basta
Ng recruiter itong aplikante nila,
Na di alam ang nilalaman kumbaga,
Di ba’t may tendency na madaya sila?
May mga employment agencies nga kasi
Na mapanloko at kakutsaba pati
Ng ilang employers din namang salbahe,
Para makamenos ng malaki-laki
Sa pagkuha nila ng mga empleado
Na maari nilang babaan ang suweldo,
Pagdating sa Saudi, sa ayaw at gusto,
Ng kaawa-awang ni-recruit na tao.
Kaya tama lang at sadyang nararapat
Itong naisip ng isang mambabatas
Na ipanukala niyang maging batas
Ang hinggil sa nilalaman ng ‘work contract’
Sa pagitan nga ng ‘employer’ at ‘worker,’
Upang maiwasan ang ‘misunderstanding’
At iba pang di dapat mangyari sa ating
Mga kababayang madaling lokohin.
Yan sa ilalim ng House Bill 4836,
Na akda ni OFW Partylist,
Cong. Johnny Revilla, na liban sa English,
Ay isusulat na rin sa ibang ‘language’.
(Partikular sa ating sariling wika
At ang POEA may hawak na kopya,
Ay ano pa nga bang ibang pandaraya
Ang maari nilang puedeng isagawa?)
At kung saan pati kung ilang oras yan
Dapat magtrabaho malinaw din namang
Nakasaad dapat sa ‘work agreement’ niyan
Pati na probisyon sa pangkaligtasan;
Haba ng panahon ng employment nila
At ang benepisyo’t marapat makuha
Matapos ang isang taon o higit pa,
Na nasasaad sa kanilang kontrata;
Na karaniwan ng ya’y nagiging ugat
Ng problemang minsan na napakabigat
Kapag ang ‘employer’ ay hindi pumayag
Ibigay kung ano ang sadyang marapat.
Kaya itinakda rin sa naturang Bill,
Na itong ‘agency’ ay pagmumultahin
Ng di kukulangin sa beinte singko mil,
Kasama pati na ang pagbabawal din
Na makapag-‘recruit’ ng OFW
Ang alin mang ‘employment agencies’ dito,
Kapag di sumunod sa utos na ito
Na ngayon ay ganap ng batas, pare ko!
