KUNG HINDI kasama sa ‘files’ ni Benhur Luy
si Congressman Oca sa itinuturong
sangkot sa ‘PDAF scam’ na sampung bilyon;
kanino galing ang hawak ni Ping Lacson?
Na listahan din ng umano ay sabit
sa nasabing ‘scam’ kay Janet Napoles,
na kung saan nga si Congressman Rodriguez
ay nasa ‘logbook’ ng dating PNP Chief
At naging senador pa manding kilala
sa pagiging matalino at bihasa,
pero ano’t hindi muna nirebisa
ang listahan bago inilabas nila?
(O baka pati si Ferdinand Magellan,
Andres Bonifacio’t Dr. Jose Rizal
ay kasama rin sa ibang pang listahan
upang tayo ay lituhin ng mga yan?)
Para patagalin ang imbestigasyon
at maitago riyan ng DOJ itong
tunay na culprit o ika nga ay author
ng PDAF scam na ang halaga’y billions?
At kung sinu-sinong mga matataas
na opisyal itong posibleng kasabwat
ni Janet Napoes para maka-‘kickback’
sa kaban ng bayan nang napakaluwag
Sa pamamagitan ng pekeng NGOs
na kunwari ay may proyektong natapos,
Pero nang siyasatin ng COA, ya’y halos
‘ghost projects’ lamang na billions ang nagastos!
At kung sinu-sino r’yan ang idinawit
ng ‘PDAF scam queen’ na si Janet Napoles;
Kung saan pati na si Oca Rodriguez
na ka-uupo lang – sa isyu nadawit.
Pero kung ayon sa mismong ‘whistleblower’
na si Luy ay wala sa ‘list of congressmen’
itong si Oca sa ‘pork barrel scammers,’
ya’y sukat mabatid ng mga Kabalen
Upang ang anumang mga agam-agam
hinggil kay Rodriguez ay lubos maparam
partikular na sa dapat maka-alam,
kung ano talaga itong PDAF scam.
Na dili’t iba ay si Janet Napoles
ang itinuturong ‘mastermind’ sa raket;
Na di kakilala man lang ni Rodriguez,
pero napasama siya sa “Napolist”
At saka papanong ang isang katulad
ni Oca, na walang CDF o PDAF
na nagamit sa NGOs ay matulad
sa umano’y kasangkot sa pandurugas
Sa pera ng bayan, na kagaya nina
Enrile, Revilla at Jinggoy Estrada;
Dahil sa tiyak na proyekto napunta
ang anumang PDAF o CDF niya.
Kaya para siya isangkot sa ‘scam’
kahit noon pa mang mga nakaraan
ay malayong siya’y isangkot sa ganyang
klaseng pagnanakaw sa kaban ng bayan.
Ultimong sentimo ng kanyang CDF,
PDAF man o kaya ibang klaseng badyet,
depenido lahat sa kung anong ‘project’
nagasta ang para kay Oca Rodriguez
At tiyakan din naman niyang sinasabi,
na kahit kailan ay di gumamit pati
ng NGO ang ating Representante,
kaya papaanong yan ay mangyayari?
Na mapasama nga siya sa listahan
nitong diumano ay mga kawatan,
gayong ni minsan ay di nga gumamit yan
ng NGO sa kanyang panunungkulan?!
