sisiksik kong binit, king lalam ning gabun
‘ti ko pang sinulad, na biglang minusbung
e yu adanasan, pali ning panaun
babaluktut kayu, alus mikakaul.
king sala ning aldo, at patak ning uran
o kaya ambunan, bubulas katawan
sakaling mapatad, babo ‘ting mibulang
n’ya sobra kakapit, anging mang daratang.
nung pane ing bagyu, kayabe ing albug
kekayung kabilyan, mimina’t lalambut
bagyang mababagut, king sikan ning agus
lalu’ t e masyadung malalam mikutkut.
megi nang payapa, milabas ing sigwa
impun a kakapit, mitas, mikasanga
memerdi deng bulung, lawe’t makayama
at keng kalambatan, lakwas yang mekaba.
king umpisa pamu, bayu pang mamunga
asungkit mapilan, mañanan la lasa
bubut nung ayagtal, ni ali mapakla
mitaman king gabun, likas a mataba.
dapot king kalwatan, papait deng bunga
malulut akakit, matabang king dila
karetang lalawe, dati mayayama
menakbag king gabun, pulutan ali na.
maski na deng ayup, a mengapalili
misamsamang kumet, tangke maybug pakli
sayang alarawan, papasyuk palagi
susulapong mako, kaibat dang kinabsi.
o nanung milyari, tanamang meragul
kayang meging bunga, anti la mong lasun
‘la mang pakinabang, sanga nang yuyungyung
itamban king kalang, api ‘gad kukurul.
sangka’t o makanian, king tanamang pinla
migmuryut ya kaya, yang naturalesa?
o ikayung uyat, kinulang aruga?
kinulang king danum, pati na pataba?.
makanian ‘lang nabang, bulung maging sukal
sakaling miragsa, ating mipatanan
mengari yang poste, telakad king dalan
nung ‘ ting mipagawi, ni ali pansinan.
kaylangan neng paten, perwisyu ing bili
pibatan ng lugal, ‘tin sang ihalili
e nasang bumie pa, salut ing kawangki
tanamang telangan, e na manatili.
anya uyat kayu, dapat nang bagutan
ban e makahawa, keti king karinan
butul da reng bunga, e na mipunla man
pamigunam-gunam, saleseng balayan.
(pasaring king gobiernu)
