Sakali’t ma-‘impeach’ si Justice Corona
Bilang punong hukom sa Korte Suprema,
Di malayong maging tulay sa pamilya
Ng mga Aquino upang i-reverse pa
Ng ‘highest court of justice’ ng ating bansa
Ang desisyon nito oras na masipa
Ang chief justice, at ang maging kapalit nga
Ay sa kampo naman nila magmumula.
Bunsod na rin nitong posibleng pagtutol
Ng mga kaanak ni Pangulong P-Noy
Sa wari ba’y mapanganghas na desisyon
Ng chief justice at ng kanyang kapwa hukom.
Hinggil sa asyenda ng kanilang angkan
Na walang sinumang naglakas loob d’yan
Upang salingin ang lupaing naturan,
Liban lang kay Madam Gloria Macapagal
Sa pamamagitan ng Batas Agraryo
Na marapat ipairal ng gobyerno;
At kung saan dapat ipamudmod ito
Sa kanilang ‘lawful’ na benepisaryo.
Kaya naman hayan ng dahil marahil
Sa puntong ang dating Presidente natin
Ang kay Corona ay nagtalaga mandin,
Malamang pati siya’y idinamay na rin
Sa napakaraming balak na isinampa
Ng DOJ laban kay Pangulong Gloria,
Kahit pa ma’t yata walang matibay na
Basehan ang kaso laban sa dalawa.
Pero ng dahil na rin sa pagnanais
Ng administrasyon na siya’y ma-‘impeach’,
Hayan… pati pamilyang nananahimik
Ng mahistrado ay gusto nang idawit?
Ng mga ‘senator-judges’ na didinig
Sa kaso kung sadyang ang ating Chief Justice
Ay may iligal o gawang di matuwid,
(Kasama pati na ang kasanggang-dikit
Na maaring idawit n’yan sa usapin
Sukdang umabot sa ika nga ay ‘Fishing
Expedition’ ang paghanap ng maaring
Kasuhan para lang makapag-magaling?)
Pero kahit pa man posibleng may ‘lapses’
Ang ‘highest tribunal’ sa iba nitong ‘judgment,’
Gaya halimbawa ng sa “League of Cities,”
Na tila nag-‘flip flop’ na ng ilang beses.
Ya’y di naman lubos kay Justice Corona
Posibleng isisi pati ang iba pa,
Sapagkat isa lang siya sa labing-lima
Na nakatalaga sa Korte Suprema.
Na maaring minsan ay di magkatulad
Ng interpretasyon sa iisang batas,
Kundi man ng dahil sa higit ang hatak
Ng isa kung kaya posibleng mag- flip flop
Ang desisyon ng ating ‘highest tribunal’
O ng alin pa mang ‘court of justice’ minsan
(Na di dapat iba ang tinititigan,
Kaysa ika nga ay kanyang tinitingnan).
Pagkat bilang ‘bar of justice’ ng gobyerno
Ay kinakailangang maging patas ito;
Upang ang ‘judicial independence’ nito
Ay tunay naman ding karespe-repeto!
