Bistaman kalupa na ning mengalabas,
Dakal la pa murin, king uli ning kasyas
Buntuk ding aliwa ring tinakman kaplas
Karing papakbung a lubus da nang balu
Ing deti ala lang ibungang matinu
King bie na ning tau nung e disgrasya mu,
Pero e ta’ murin madadala rugu?
At parati ta’la muring sasaliwan
King agyang sidsad la kakamal nung misan
At karen ala tang’ akuang pakinabang
Nung e mu peligru at kaplas katawan?
Antimurin dening apanugalyan da
Ing papakbung baril ustung bayung banua,
Balu ra nang delikadu ing antita
At e na la ditak ding ken medisgrasya
Ampon apate ra karing liling balas,
A pasari na ning makanyan a dapat,
Pero intasa pin yata agyang ditak
E no’ tatablan ning konsensya ring turak?
Inya anti na ning ing pamipapakbung
Baril at aliwang klasing rebentador,
A sobra kasikan masulit ikontrol,
‘Total ban’ na ing ken mayan a solusyon
At pekamasanting diling kautusan
A sukat nang lubus ganap ipairal
Ning gubyernu banting ing bage makanyan
Mabawas nung e man mapatpat bigla yan!
Para nanu’t iting makanyan a bage
A e makalingad ing deti yang pane
Mitsa ning disgrasya at dakal nong mete
Karing anti karen pakaban ta’pa bie?
E king ding gagawang ‘sinturan nang Judas,’
‘pla-pla, whistle bomb at good-bye pilipinas’
Ding kakung amanwan paten tamu’t sukat,
Nung e’ing pamangawa ing ibawal dapat.
Kasi, anti na ning ding ‘manufacturer’
A mialiwang klasi ping papamakbung ken
Asna kasulit dang bawal gawa karen,
Inya ‘total ban’ na ba’lang patugut den!
Nanu pang papakbung a sobra kasikan
Ampon aliwa pang maging mitsa misan
Ning silab nung ala na pin metung mu man
Magtinda kareti nu’man karing lugal?
Nung sana kalupa ning karin king Saudi
A sobra kaigpit ing batas da reti;
Ing alak uli ning makabawal iti,
Ala kang akit a magtinda kaniti.
At uli ning kabud keakitanan ya
Ing ninu mang karin marakap magtinda,
Yan king kulungan ing pihung karasan na,
Alang ninu pa mang lalabag karela.
E na kalupa ning keti Filipinas
A nung insanu ing bawal yang maralas
Kapad da menasa, kasi pin ding batas
Keti kakambal lang kapit at padulas!
