SUBIC, Zambales – Arestado ang isang tindera ng isda matapos itong mahuling nagbebenta ng mga isdang huli sa dinamita sa Bulungan Fishport Complex sa Barangay Baraca-Camachile sa bayang ito.
Kinilala ng pulisya ang suspek na si Perlyn Buenaventura, residente ng Barangay Mabayo, Morong, Bataan.
Ayon sa ulat, ala-1 ng madaling araw nang magsagawa ng “Oplan Kalikasan” ang team na pinamunuaan nina Chief Inspector Virgilio Rubio, hepe ng Zambales CIDG at Sr. Inspector Alfredo Simbol, hepe ng 301st Maritime Station at huli ang suspek sa aktong nagbebenta ng isdang huli sa dinamita.
Narekober ng pulisya ang may 40 kilos ng isdang talakitok sa pag-iingat ng suspek na nakalagay sa tatlong cooler boxes.
Kasong paglabag sa itinatadhana ng Section 88, paragraph A ng RA 8550 ang kasong kinahaharap ng suspek.
