(Kaugne ning pang-165 banuang Aldo nang Beitan ning mapuring bayani, a mipagmasusian ketang Mierkokes, Agosto 8, 2018, king Robinson Plaza, Siyudad San Fernando, Pampanga lalam nang pamanimunang Mayor Edwin ‘EDSA’ Santiago, iting poesia a makaparikil king meging bie nang Don Tiburcio, a megamit pyesa para king ‘Speech Choir Competition’ a pilaban ding anak a magaral keti king mesabing siyudad, ya pamung ibie mi para king malugud yung pamamasa).
NINU’Y Don Tiburcio Hilario y Tuazon
keti king Pampanga meging gubernador?
Mapilan na la ken ding kabalen tamung
makibalu agiang karen king Capitol,
pablasang makaba na pin ing panaun
a milabas kaibat na ning rebolusyun.
Ya simple yang tau, malumeme bina
keng pamangamanu o pamagsalita;
Agpang king istoryang kekatang abasa,
kabalitan ya keng sobra kaganaka;
Nung kakilala ne ing akit nang bigla,
kumbiran ne’t yagkat mangan ilang adua.
Bista’t iti e na katutula misan
ning keyang esposa ing e mamili mang
kakaluguran at dapat pakiabayan,
pabirung pakibat na nung mayap la ngan:
“Ninu ing maliari kung akatambayan
king purgatoryu nung karin ku mipalpal?”
Dapot pangaras keng bage e makatud
e me kapilan man apagalgal a tud;
I Luna’t Mascardo a digsu mipamuk
king uli namu ning sobrang pali buntuk,
Ya’t y Nicolasa Dayrit ing misaup
ban salesen deti ing milyaring gutgut.
Pilatan da reting mesabing gereru,
a parehung ating matibe prinsipyu
ampon alang kanlap marap agiang kenu;
Pasari namu ning utus nang Emilio
ning Kawit, a e na pemintuan Maskardo,
At nung ali, digsu mitdas keti’ing gulu.
Pero waman e na ikuang pengilagan
ing ‘self exile’ ning Don king bie nang delanan,
I Leandro Ibarra’t Marcelo del Pilar
King bage mesabi aligtas na no’man;
Malalagua atin yang taung tiburan
ban ding adua lihim na’lang patakasan.
Makatuliran ya bilang abugadu,
inya ding Kastilang Juez karing jusgadu
a mapangabiran king gawang e ustu,
kasangilan na lang Atty. Hilario;
Pablasang ing keya tune makatau
at ala yang buring lulto argabyadu,
Deting mesambitlang papil nang gimpanan
ning bayaning kekatang kalalawigan
mapilan lang dake king bie nang delanan
a meging ambag na keti Kapampangan,
at e sukat matda king kapilan pa man;
karing bilungan na ning kasalesayan.
At nung nu’ ing peka-maulagang dili,
malino – king iti e makasarili;
Uling nung biryan na ing mie komportabli
nanu’t gigulan na ing panaun niti
keng peligru’t e nia linukluk kampanti
king keyang santungan antimong mabandi?
Malagad lang bina king yatung karinan
ding mibabait a mas dang paulagan
Ing mie timawa king sariling balayan
kesa king magsale ya man keng pibandian
pero ding adua nang gamat kaili’t waman
maka-kadena la king dikta ring daywan!
