ULI NITI banting mituklip nang lubus
ing inggil kaniti, yaduan kung mirungut
kami ning composer, kambe ring testigus
king tanggapan ning Sangguniang Panglungsod
At ipalad ku la keng pirurungutan
ding kopya ning himno kakung tatalanan
ampon aliwa pang malino piakitan,
a ing akung tune makigawa kanian.
Mupin keng bili ku, anti na ning aku
eku memalen ning siyudad San Fernando,
medyu malabug ing mas paboran da ku
kesa king talagang tune Fernandino.
At e ku botante king mesabing lugal
a maliaring kampian na ku ning ninu man,
lalu na mekad ding keti manungkulan,
antining e na ku man ken manuknangan.
Iti ing kanita pang minuna kaming
mirungut-dungut di Konsehal Lazatin
at ding pamilya nang kumpare kung Norming
ing aulata ku kilub city council.
At nu’ tinigtig king kakung pilubluban
ing aku dehadu kung pihu keng laban,
uli ning ninu mo aku ban panigan
ning ninu man karing ken king sanggunian?
At agiang ninu pa mapaliaring e la
mu naman makialam uling manginlag ya
king anti kanian a isyu ban kanita
alang maginakit karing kasiyudad da.
Panahun nang Mayor Oca niang mibuklat
ing bage’yti kapamilatan ning sulat
nang Irwin Nucum king Sangguniang Siyudad
(niting San Fernando) – a nu’ na bilalag
Ing inggil kaniting maselan a isyu
buri nang mirinan pansin a masolu
ban makikilala ing nung talagang ninu
ing ‘Man behind the Hymn’ da ring Fernandino.
Kabisadu na ku pangamat Ka Irwin
karas keng makanian, iniasa’t antining
ing partisipasyun ku e mirin’ pansin,
aisip neng sulatanan i Lazatin.
At nu’ na inawad ing sana mirinan
‘due recognition’ ing papel nang gimpanan
(yours truly) king Himno, a nu’ na sinoluan
Mr. Del Rosario ing anggang dangalan.
At agiang kapurit e na ku dinake
king honor a keya bukud mu ping mibie;
balu nang Nucum ing anggang bage-bage
dikil kaku karas king kultura’t arte.
E ke mamalatian gelingan paniulat
ing king isyung iti, bali ing ‘defendant,’
e king kayabangan, malaut e palak
ing keya kesa king kakung kapasidad.
Nung keya beyaran de man iting Himno,
king pangagawa na, aku agiang singko
e ku makirake – nun’e ing kanaku
lunto mu ing tutu makusuelu na ku.
‘Truth will set us free’ ngana ning kasebian,
nanu’t e katamu ken manalumpakan?
Mabayat ing keng bie ating sisipitan
inia ing e ustu – e dapat kumkuman!
