1.
Tete ning Sta. Monica, king San Simon e maglambat
nung e man maglukluk iti mekad kabud niya misaldak
neng keti no ngan daralan dening mangaragul a truck
a manibatan king new hope a kargadung mangabayat
pelalung dump truck ding 4B keti na la rin lalabas
e no bisang mipalaut at dumalan king manabak
2.
Samantalang king panaung gagawan de pa ing dalan
ning baryu Sta. Monica king Manabak la daralan
kaibat deng apanyira ing dalan control at king San Juan
ing Sta. Monica naman ing aplit dang bubugbugan
nung matibe ya sa’ing tete a karelang daralanan
alang problema king agiang karin la ngan magpamisan
3.
Den pamong lalabas a truck no pangabayat a karga
agiang 6 wheeler la pa ren pang 10 wheeler la darala
mekad uling kargadu lang migit benti tonelada
neng lalabas la king tete damdaman meng mumutyut ya
king bungad na niting teteng inaspaltu da kanita
malalam ne ing lukib nang tikpan dang pansamantala
4.
Ustung ita’ing kinawani nanu kaya ing malyari
e mo kaya rugu mika-malagim a aksidenti?
e ra kaya aisip ding manungkulan tamu iti?
lakwas na ring kng barangay a makasakup kaniti
ustung melasak ya’ing tete kaninu mibuntun ing sisi?
kanita no mipanuru nung ninu ring responsabli
6.
Kanita la pamu kimot ampon gawang ordinansa?
ustung atin menganate karetang mangadisgrasya?
masanting nang lisyan mu ing nanu mang sakit a dugpa
kesa ketang manulu ka ustung iti malala na
e wari mika-load limit nang mitakda kanita pa
e la milub ding kargadung migit limang tonelada?
7.
Dapot itang resolusyun a kanita da petupad
binayu re’t magsilbi nong lungub ding 6 wheeler a truck
sablang isip da ring tau reta mung ELF ring lumabas
dapot forward lang 6 wheeler a kargadung mangabayat
inia e ta na pagtakan nung datang man itang oras
a ing tete mesambitla maglukluk ya at misaldak
