ipinagdiwang ng liping Filipino
ang ‘Independence Day’ (na aywan kung ito
ay nakamit na nga natin kabayan ko).
Sa dahilang tayo ay di pa rin ganap
na nakawala sa kukong matatalas
ng mga dayuhang sa lahat ng oras
ang para bang nasa likuran ng lahat.
At kung saan tama’t tayo’y may sariling
mga pinuno na pawang magagaling,
pero nagagawa silang paikutin
ng tusong dayuhang kaya silang bilhin.
Partikular na r’yan ng mga may hawak
nitong malalaking Mall sa Filipinas,
At Intsik ang halos may-ari sa lahat
ng negosyong patok at mga pang-‘big shot’
Anumang hingin n’yan sa nasa Palasyo
di makapapalag ang kahit na sino,
lalo’t milyones ang itinulong nito
sa kandidatura ng naging Pangulo.
At kung itong nabiyayaan ng tulong
para may magamit nang ito’y humabol
ay nanalo sa kung anong inambisyon
na ‘maging’ ay tiyak ‘sisingilin’ ngayon
Ni Seng Hua o ng sinumang indibidual
na ‘nabili’ nitong panig ng kapital;
kaya natural lang ang puno’t dulo niyan,
di na masita si Seng Hua ng binigyan.
Diyan pumapasok ang isyung ika nga
ang tayo ay di pa ganap na malaya
sa kamay ng mga mapagsamantala,
ng dahil sa lider nating masisiba.
Na ayaw bumitaw sa pagka-alipin
ng mga dayuhang palalo at sakim,
na palaging nasa likuran ng tabing
at bumubulong kung anong dapat gawin
Nitong nasa poder na sunud-sunuran
sa kung anong gustong ipagawa ni Sam,
ni Seng Hua, ni Ali, at nitong iba pang
idinidikta ang nasa Malakanyang.
Kaya sa puntong yan na nang dahil na rin
sa ‘utang na loob’ nitong iba nating
mga ‘lingkod-bayan’ kaya nangyayaring
tayo’y di makalag sa pagka-gupiling
At hanggang ngayon ay di pa rin nga ganap
ang paglayang laon nating pinangarap;
ya’y nang dahil na rin sa maraming ungas
na nasa gobyerno, na panay ang sikwat?!
Sa pamamagitan ng pagkakaisa
ng lahat marahil ay maka-aasa
na tayo kabayan, na mababago pa
ang takbo ng ubod duming pulitika.
Na kaya di tayo ganap makawala
sa pagka-alipin sa sariling bansa
ay nang dahil sa lider na masisiba,
(ay ano pa nga ba sa ating akala?)
Mula ngayon ating bantayang mabuti
ang ating paligid… at hangga’t maari,
ang lahat na upang makamtan na pati
ang tunay na Laya at Pagsasarili!
