Nabengi king bale uling malisangan
Minta ku king papag lalam ding tanaman,
Ing sapul ning angin kakung daramdaman
Misna king katamle,banayad daralan.
Ing byung da ring amuk,gaga ring kuliglig
Begayan ning angin ketang kayang tigtig,
Plegarya mo waring kanaku sisitsit
Kinarug ku salu ampon mengaligkig.
Ing aslag ning bulan atmu kakulimlim
Malabug mu naman ing sala ding batwin,
Nya pala makanyan ing kakung apansin
Memun ne king yatu ing Poeta Guding.
Pinapinandit mu ing lulam tinakap
King bulan at batwin a matamle aslag,
Ing lwa na ning banwa kagnan nang mebalag
Anting makirame king poetang maslag.
Ing Poeta Sagum,metung yang prinsipal
King Brgy. Talang a beita nang lugal,
Amanu’t kultura matapat neng kawal
King pamangambul na e byasang matikal.
Ketang kabilya’na agyang tin yang sakit
Eya rin kinupas king radyu daralit,
Ustung lalakad ya kekaming akakit
King kayang pangimut, ing pamagkasakit.
Inya ikeng sablang abe na king radyu
Gagambul manese king mal tang amanu,
Kekeng daralangin arapa’ning Guinu
Tanggapa’ne ning Dyos ing kapatad tamu.
Potang atyu na ka king banwang karinan
Sana ligaya ka king kekang kabilyan,
Uling kapilan man ene makalingwan
Lagyung GUDING SAGUM karing Kapampangan.”
Dolly Gigante Ferrer
Barangay Anunas,
Angeles City, Pampanga
