lalangi ne ing pabelu, singap-singap ne ing sala
mibabalik ing dalumdum, mibalik king kapa-kapa mamasa mo na manakit, at mikadinang pag-asa king tatalan keting sulu, takakiki kayang giya
mayna mung tyup na ning angin, manigalgal ne ing gamat migaganakang matda ya, lalung alang asasapat talatuki king kagulutan, sabe sabeng malingapngap mimisip nanung paralan, ban ali la mipajamak
iting laman na ning tukil, ditak ditak magigisan
pamang-gamit alang tuknang, pansarili yang isipan pilan la deng makinabang, ila mung miparan-paran marakal a bisang aslag, mengakulung king kabengian
panibala iyang talan, tinas tamung agnan-agnan migsilbing metung a boses, king kaya mu peparalan kabaluan balang sabla, masanting a pararasan keting sulung atyu kaya, taguyud na keng kapasnawan
dapot ngening malalyari, mengari yang alang buntuk ing tiwala mengalaglag, bagya bagyang mapupupus pakunwaring pamun mako, galame na’t meging ipus sarsuela yang pepayalben, panapal king kayang gusut
nanu kasing susuluan na, pilitan nang mantun dinat king dating kakaluguran, o ba’t ngeni mibaligtad mengalulung king ambisyon, sosobra ya king kayagap maski nanu mang paralan, e baling ‘ting adamusak
nokarin naka tamu dalan, pati baleng pakamalan nung iya malili na, e balu ing pupuntalan agyung pikawa-kawani, dening kayang sasakupan kanita misasang-metung, mapilan la mung sasalangsang.
