ANG ISINUSULONG na planong pag-’phase out’
ng LTO sa dyip na pampasaheros
upang umano ang luma na at bulok
ay mawala na rin pati ang mausok
At mapalitan na r’yan ng moderno
at/o ibang klase na bagong modelo,
na maganda pero ang halaga nito
ay katumbas naman ng lima siguro.
Magara at mura lamang ang ‘maintenance’
ng mga ganitong uri ng sasakyan
ngunit kaya naman kayang mabayaran
nitong ang dyip nila’y i-junk basta na lang?
At matustusan ang pagkuha ng bago
at ubod ng mahal na pampasahero?
kapalit ng dyip na ang labas por kilo
sapagkat wala nang bibili pa nito?
Sana naman ay huwag gawing sapilitan
ang pag-’phase’ out basta ng pamahalaan
sa naging bahagi na ng kasaysayan
at nitong kultura nating nakagisnan.
Dahilan na rin sa bukod-tanging tayo
dito sa Silangan o sa buong mundo
ang may ‘public utility’ na ganito
na lubhang kakaiba kahit na kanino.
Sa Amerika ay walang maliliit
na UV o tulad ng ating mga dyip
na namamasada at kung saan kahit
sa ‘remote places’ at saka malalapit
May masasakyan ang gustong mamalengke,
mamasyal sa ‘downtown’ at sa tabi-tabi;
Sa State kung wala kang pambiling kotse,
wala kang ‘choice’ kundi maglakad parati.
Sa ninanais na mangyari at sukat
ng LTO, di lang ang kakarag-karag
na dyip ang tiyakang di na mailalabas
kundi ang iba pa r’yang saklaw ng batas
Na ipaiiral ng ating LTO
matapos pirmahan ng ating Pangulo
ang ‘implementing rules’ hinggil para dito
na dapat sundin ng mga apektado.
Kung saan marami tiyak ang aalma
na ‘jeep operators,’ mga tsuper nila,
lalo na r’yan itong kumbaga ay sila
mismo ang may-ari at namamasada.
Sa puntong ito ay wala nang hihigit
kaysa sumunod sa anong ninanais
ng LTO upang di tayo magipit
sa oras bago pa ang mga nabanggit
Na alituntunin at marapat sundin
para di ma-’phase out’ itong luma nating
pampasaherong dyip ay dapat ayusin
bago sa kalsada’y ating patakbuhin.
Hindi iyong basta umaandar ito
ay atin pa rin nga ‘yang pinatatakbo,
kung saan di lang buhay ng pasahero
itong nalalagay sa grabeng peligro
Kundi pati na rin syempre ang sarili
nating kaligtasan ay damay din kasi;
Kaya wala nang higit makabubuti
kaysa sa batas tayo sumunod parati!
