Meging pisak ing kaugtwan ning aldo king oras a ita,
King uli ning kule abung asuk a magpaytas banwa!
Ing bulkan a pilan siglu nang matudtud, migising ya
At ikwa rang mirasan king masangil a panga-mwa na,
Ding keraklan karing balen a binang malapit keya,
A keta pepalbug niti king lahar a binubud na.
Ing Athenas ning balayan a luklukan ning upaya
Nyang ing kapamalan keti pamalakad pang Kastila,
Ya ing lubus misakitan ampon ganap mepinsala
King matinding kalamidad alang kasing-sangil bina;
Uling pelalung pisamban mikutkut anggang kapitna
King karakal ning balas a pisakit nang keni bigka.
Baket e mas masangil ing mepalyari king Baculud
Ngening iting digpa karin e mu karaniwan albug,
A kabud mu danum uran a linapo karing ilug?
Nune iti mibabayang lahar a keni na bibud
Nitang bunduk Pinatubu a mig-alsa namu kabud,
Nyang ing syensya belisa ne’t sinira niaman a tudtud.
Mika-sitsit kasi king yan balak de sang’ kabitanan
Karing bayung instrumentu a nung makananung mandar
Ing metung a makinarya a e na mangailangan pang
Gasolina o nanu mang bage malyaring dulukan,
Banting apagana ne yang meto’ plantang asmung sikan
Kapamilatan namu ning inaus dang ‘geothermal’.
Iti ya ing ukulan dang meging mitsa a nung bakit
Ing bulkan ning Pinatubu migising ya at memuangit;
A nung nu’ king kamwa niti tano’ pemasibas aplit
Pati na e sukat yabe a keta mananahimik!
At uli ning bata’ ra neng alingasngasan dusuldit,
Makanyan yang mesora iti karing manistorbung pilit.
Wa, kailangan ning insanu mang bansa o komunidad
Ing panyulung a sukat nang ibie karing keyang anak;
Dapot iti nung labag king naturalesa, e dapat
Uling magkang maging mitsa mu king bage e masampat,
A’yantimo ing milyaring masangil a kalamidad
A meging bunga ning sobrang pamakialam king e sukat.
Male ta’ kagulutan nyan nung nanung bitbit nang lihim
Nung bakit ing Pinatubu kabud-abud nya migising;
Ing Base Militar na ning Amerika a nung nu’ pin
Kilub ning pilan dekada, yan e re atagkil-tagkil,
Nanu’t iti’ing anti waring minutus ba’neng mabating
Y Uncle Sam, a malwat nang king bansa ta’ maka-himpil?
Male tamu nung nanu pa ing nasa nang ipawatig
Ning bulkan a king agya mang ala yang kaimik-imik,
Atabi ne y G.I. Joe king Zambales at king Clark Field;
Uling waman ing palugit da ring Base e ma-ulit,
E ta’la rin kalalagwa king kaburian ta’ apilit
Pablasang ing Amerika e ta’ neman kamatulid.
Oyan, uli ning atin tang’ sipagan at tetagan lub
At king mal tang’ lalawigan maki-malasakit lubus,
Mapilan mung banwa keta ing milabas matalustus,
Ing Pampanga mibangun ya king matinding panga-lugmuk;
At ken uli ning Mega Dike a meging kambil king albug,
Dakal no’ ring me-ingganyung memagbalik ken Baculud.
Ngening akabiusan tana ing sangil ning Pinatubu
(At melubak ne talan king kuldun tamu iting Kanu?)
Kapampangan, king uli mu marahil mangaintulid mu,
Ing yan pagmasusian da ring anak mung malugud tutu;
Uling e mu pin bukud king kasakitan ta’ me-angu,
Nune pati ekonomya ning lugal mesanting lalu.
Tanda king yan malino neng Tagumpe ning Kapampangan
Laban king kasangilan na ning mapaminsalang bulkan;
At pati kang Uncel Sam a pilan banwa nang sasakal
King kekatang ekonomya at sistemang pulitikal,
Iti ya ing meging dalan banting maging gintung uryan
Ing tilbug mung tinggaputi a sasyo tang’ Katimawan!
