Canitang i Apung Cristu mipacu ya
ban tamung micabus king pamicasala
nanu mo ing meging papil na canita
nitang inaus dang taung palamara?
catacsilan caya, itang depata’na
o gulis nang palad a mitacda caya?
Ing Talapangabus bayu Ya pa datang,
masasambitla na ketang lumang tipan,
king ing anac ning Dios carin king catasan
tipa ya keti king babo ning sicluban
capamilata’ning ibait ne ning Nuan
a babaing birheng alang keyumanan
Pauli ning lugud at calam ning Ginu
king icaligtas na king api ning tau,
pigcalub ne king ban yang magsacripisyu
ing bugtung nang anac a i hesucristu
sinabi na caring alagad na mismu
panganyaya nacu ning metung kecayu
Ketang Getsemani cabang mangadi ya
i Apung Cristu at ding apostoles na
detang saserdotes, carin dinatang la
abe re i hudas at ding sundalus da
at ing daracpan da ba reng akilala
inuma neng hudas ing mamu nang lupa
Pepailasa ne canita i Hesus
caretang gamat ring masangil a hudyus
angga king mipacu’t mate ya king curus
at king casalanan tamu ngan micabus
ing miliaring ita pigsisia’nang lubus,
hudas a cayabe caring disipulus
Ing meging papil nang hudas iscarioti
metung ya caretang maulagang dili
apin yang mepiling ginanap caniti
king ban itang dapat ya cabud maliari
at yan ing catutuan, uling masasabi
mipamintuan ing lub ning Guinu parati
At uli ning iti ing caya mitacdâ
a dake na king ban matupad ing ulâ
Ing tutu na nita, bisa ya’t e bisâ
uling yang papil na ala yang agawâ
Inia pin cang Judas, e ta’ dapat mimua,
Nu’ne suca’ta’ pang pasalamat atâ?
At nung pacasurian ta yang miyamasamas
ing meging papil na tutu yang mabayat
pablasang yang into a pecamarawac
at contrabida nung wari king palabas
king gewa na niti a memungang mayap
ken mong pamalac yu tacsil ya pa’y hudas?
