DENING DIPUTADO ampon Senadores
A isipanan tang’ sangkut kang Napoles
Keng PDAF scam a nu’ posibleng suspek
Pati e bala ken a mananahimik
E malaut king y PNoy misabit ya
Uling miyembru na la ning kabineti na
Ding menasa sangkut karing milyones a
Gisan dang linaso ampon pemubud da
King mialiwang lugal a pepalto reti
Bilang proyektu ra matulid a sabi,
Pero ing katutuan metung man kareti
A pepagawa ra a ngarang sasabi
Ala kang akit ken king tildu rang lugal
A meyari mo sa’ karing kualtang dakal
A megastus nune kaputut a dalan
Ampon istrakturang posti la nung misan
Ding makatalakad karing dapat sana
‘Muliti-purpose building’ ya ing pagawa ra
At/o kaya naman kongkretung kalsada,
Uli ding badyet den gisan dong pemulsa.
Dening mangatako at alang pikabsian
A opisyales tang’ kine king tungkulan;
At nu’ pasari ning kelan dang masabal
King ikanono ning mal tamung balayan
Pamagsimbambalu mu ing papakit dang
Malasakit deti karing sasakupan
Pablasang sumangid ning sabla, ala lang
Interes nung e mu sariling kanawan!
At igisa re ing balen king sarili
Nang taba ampon pang aliwang diskarti
Ding magkukunwari a bisang magsilbi
Karing kabalen dang parating duhagi
At lakuan dasan ning malyap a tagimpan
A pangakuanan dang pane neng alalan
Dinan dang matatag a pamangabiayan
Kapamilatan ning ngara obrang dakal
Pero nanu ngeni ing mayayakit ken?
Wa, tutu dakal la pin sa’ aluban den
Pero angga mu king e la mipirmi ren
Keng obra uli ning mipairal karen
A ‘contractual’ la mu king karelang obra
At tia’nam mung bulan itang kontrata ra;
Nung nu’ angga na king akua reting tumua,
‘Casual’ la pa murin – mipirmi, ali la.
King puntong mesabi, obat ing bage yan
Ing e ra adinan pansin ditak mu man,
Ding kekatang mangatikding ‘public servants’
Ban itamu e ta’ mie paldak,sikaran
Ning kakaluluan a parating bibekut
Ding menasa alang isubu king asbuk
Nune king abli rang bage a pemulut
Karing tambakan basurang meging bunduk!
Inya nung atin lang konsensya marahil
Ding opisyal tamu a mapagmagaling,
Ing bage iti yang dinan deting pansin,
At e pamanako keni, keta’t karin.
Kalupa ning ngeni lubus mayayakit,
Ing kalulung balen yang magkakasakit
Keng pamangawan dang puru pamangupit
Karing kualta niti a ibat mu keng buwis.
Matulid mu mekad ing mikasuan la ngan
Ding anggang posibleng dinapat makanian,
Ban keta ing bage yan ganap mirinan
Tamak a parusa kilub ning sukulan!
