Sulapo ka, Pusu, sigpo kang lipakpak…
E mu wari balung pindam dakang pakpak?
Ayan meng balen kung labwad ding bulaklak
keya idalit mu lugud kung busilak.
Sabyan mung ing aldo ta ne mamutyawi
king pamagbangun na ning Indu tang sawi,
keyalimbawa na sampagang melawi…
ngeni panawun na king baneng mibawi.
Lapitan mo detang ayup babo dutung
yagkat mu lang dalit, at makisanmetung,
sabyan mu karelang tane milululun
ing dase nang paldas ning Indung migmalun.
Sabyan mu karetang kawan king marangle
iparamdam da na ing masayang gale
uling ing Indung mal a malwat miyungle
pupulisan na na ing lwa nang mengale.
Isitsit mu karing batisan at ilug
bawasan ing lumbe, ilako ing tabug,
king pamiyugnayan tamu magtambulug
keta ing Indung Mal e mapda at lumbug.
E mo kakalingwan, ayan mu la, Pusu
ding kakaluguran, kapatad, kapusu,
sabyan mu karela tubud dakang pusu
ban keta akit da, lugud ku king pusu.
Sulung at sabyan mu, luguran taya ngan
ing amanu tamu, Indung Kapampangan,
iti, yang salita ning balen tang tibwan
karing balang pusu, dapat yang misidwan….!
