Inya ing dalumdum misnang karayuput,
King tintang limputan lagad-lagad lalsut
Ing kildap a tutung makapangilabut;
King kurug ning duldul, tatatap, mumutyut
Ing labwad a anting gagalgal king takut!
King bwangit na nitang mamyus a panaun
Makipalkasan ya ing ugyug ning ayun;
King balen San Diego mignganga ing gabun
Keta king tulid na ning metung a asun;
At king linto abtak, karin ya mibangun
I Sisa’ng pete na ning dusa’t pagmalun.
Miglakad-lakad ya busal na ning pisak,
Ba’nong panintunan ding adwa nang anak;
Ngana nang magkanta…ngana nang gulisak!
Ngana nang saingsing at ngana nang kumyak;
Inyang kabuklat na ning awang ning abak,
I Sisa ati’ne king balen… teterak!
Ing ayus ning balen pagugumasdan na
Dakal nang migbayu kesa ketang sadya;
Lalu nong’ mibayu retang Maria Clara,
A mekuyad a bwak ampon kamisola;
Kabang detang dakal a bayung Ibarra,
Ilang e paurud a anting pirata.
Aisip nong’ Sisa ding adwa nang suli
A panenayan nang datang itang bengi;
Mekad ngeni ngana miratang no’ reti,
Pagsadya kong’ kanan a apisulu mi;
Mipapulayi neng minta king palengi
Ban saling nanu mang isadya na niti.
Inyang tumawad ne…Dios ko, king alaga
Maybug lang mibural ding adua nang mata;
Ba’t na mamulang ne ing kalulung Sisa,
Lalu yang memulang king presyu ning tinda;
Ketang e’na serya mipapulayi ya’ng
Mibalik king abtak a penibatan na!
(Nung ing panialiwan ali na mimura
O e’na mapigil mitas a alaga,
Dakal la ring Indung king kasakitan da
Mamulang lang anti king kalma nang Sisa;
Uli ning pelalung adwan mu kanita,
King sakit na ning bye, pamisali ra na.
Kanita atin ka yatang dyes sentimus
Patingapun mu ne kanung para-gastus;
Inya nanu’t ining Sisa e malaus
Subi sakit kaybat na niting atalus,
A’ing katumbas ning kayang dyes sentimus,
Ngeni migit nang limang dalan a pesus!)
Diwa neng Poeta JOSE M. GALLARDO
ning Candaba, Pampanga
