Nung ating maburi keng putahing Intsik
metung ne y Pisuk, lalu na keng pansit;
At yan agyang yamung ulam na dusuldit,
ing sunlam ya lupa malaut mung akit.
Bukud keng gisadu, ing kapad nang lakuas
mami o sebawan a mamaras-maras;
Inya naman agyang nu’ya lugal miras,
kaya e problema ing mirasan oras.
Misan a tikatik ing patak ning uran
King Mamon Luk, Quiapo a “fast food” mu bilang
Karin na aisip lungub magminindal
Ban ing pansit keni akua nang atakman.
Pablasang iti na ping mesabing “fast food”
kabalitan ya keng mami’t pansit luglug;
Wayta pin, keni ya memirapal linub,
ing pamangan keni king ba’nang asubuk!
Kabang panenayan na ing inorder na,
ining Pisuk medyu magugumasid ya;
Ikit na… ding Weyter alus lalaki la
a keta aplit keng pamanistima ra.
Malagua’t salita inapag ning Weyter
ing mami at sipao a keyang inorder;
At ngana kang Pisuk: “Okey na po ba, sir?
Baka mayrun pa po kayong ibang “order”?
“Wala na, yan lamang” ngana nining Pisuk,
king Weyter a keta ume neng gumulut;
Kaibat, ginogo na ing laman ning mangkuk
Ban maglasa itang sangkap dang pemulug.
Meyama yang bina y Pisuk keng lasa
ning Mami a keta inapag da keya,
Inya naman itang takam ning asbuk na
daig ne bilis ing potrung pangarera.
Pero penandit mu, mebagal ya langut
inyang aramdaman na king keyang asbuk,
Ing ating “noodles” a e’na langut-langut
At agyang nanan ne, e nia rin aputut.
Inapsa ne iti…a keta malino
Ikit na king iting miyabe king silyo,
Sintas yang sapatus a manilo-nilo
Keng pangababad na king mapaling sabo!
”Weyter, weyter,” nganing mikalukung Pisuk
mekeni lon mu’y ini” (e ne menagalug;)
“Nanu pu ita, sir” (e pala Tagalug)
Obat ing binye mu ‘ting taling sapatus?”
”Ay, salamat pu sir, dakal pung salamat;
Ing tutu na pu nyan, den napun pang abak
Payntunan ku na la… e ko pu akapkap
Ban pipian… uli ning asno’ king karinat;
Sir, ing kaparis na…anting dapat mayap,
Ban e na ku mu pu magal pang mangapkap;
Paki-tsek yu ne’mo keng tagan yung ditak,
Pota iti e ya mu meyakit agad?
