Gatpanapun ume silim matitigtig yang plegaria
cuculait ning cumpana ating taung mukyat banua;
Siping na ning mewala bie manangis ya ing dalaga
pagsalbatan ne y Oscar, ing tapat nang kepalsinta.
“Oscar baket licuan mu ku” nganing cayang tagulele;
“emu wari simpa cacu damayan mu cu anggang bie?
Dapot ngeni licuan mu cu kening lungcut magsalale
atyu dulum ning pagsalbat, busal ning calmang malumbe.
Inia ngening ala na ka, ala na ing pacamal mu
itang tula’t caligayan mepupus nang sabla cacu;
Waman mabie cung mistula keti babo na ning yatu,
Nung ala ca king cacung bie ala nang ulaga cacu”.
Macalunus ing milyari caring aduang cayanacan
a maluat nang mipalsinta mibabatang casakitan;
Ing lalaking biasang tupad king singla nang capangacuan
arap na ning Mayupaya dinaun yang camatayan.
Binuat da ne ing cabaung, ing bangke na nitang mete
cambe na ning Ave Maria at malungcut a ponobre,
Samantalang itang Riza tatangis yang mag-imate
pagsalbatan ne y Oscar keng cutcutan darala re.
Caras da king camposanto sicban ne ing cabaung na,
Ngungulangul yang tatangis “panusigan yu ku!” ngana;
“Ibuklat ye ba’keng akit ing tapat cung kepalsinta,
pabakal ke ing pusu cu idala ne angga banua!”.
Binuat da ne ing cabaung ketang aun da ne dela
samantalang itang Riza ya naman ing piyaglo ra;
Uli na ning sucal a’ lub e na agyung apibata
mebungsul yang alang male, ketang gabun miragsa ya.
Caibat, inuli re bale malungcut ya’t alang bulad
aldo’t bengi e mamangan, e matudtud agyang ditac;
Kilub na ning cayang cuartu iti parati yang kikiac,
E re pansin ding matua na ing anac dang mayayayat.
Mecabulad iniang misan aisip na ning Indu na,
liban ne king cayang cuartu ing magsalbat a anac na;
Cabuclat na nitang pasbul “Dios co!” nganing gilisac na
“baket nanu ing milyari, baket anac ninanu ca?”
Metung yang malaying punyal sicsac na king cayang salu
cucutnan de e bubulad pablasang e na’na balu;
Ing pusu nang banal Riza ketang daya ya mindilu,
king uli ning sucal a lub e na malyaring mipagyu.
Atin lang ikit a sulat keng gamat ning mewala bie,
kinua ne ning cayang tatang mirarapal binasa ne
nganing sulat mengamanu, abasa rang masalese:
“Ala cong pamarsalanan cusa cung migpacamate”
“Nung mabibie na cu tatang pakialaman yu king sinta,
mayap na ing depatan cu king cutcutan na paynawa;
Ing lalaking pilkaran yu pepaymate keng dine na,
arapan ning Mayupaya, casal cami carin banua!”
Leonardo “Adre” Lacap
Barangay Sta. Maria
Macabebe, Pampanga
