Nung ngeni me pamu pilit babayutuk
Ing kuayan a binang mataram na suksuk
Yan king pamalak mung agawa meng paud
Emu ne apande king buri mung alkus.
Uling ning nanu mang bage mipaburen
Kinusad king e na kailangan taleten,
Adua mu kabud ing kararasan na ken;
King usto? O ala mung kamasalesen?
Kase, nanu pa mang bage e meyagap
King kailangan niting maging alkus dapat,
Ala nang muna king kabang yan e masyas
Yungyung me king buri mu paritak-ditak
Uling angga mu king mabunglu ya kabud
Nung iti pilitan me pang ibaluktut,
Iti angga na king tumua ya’t makutud,
Ing kapalyarian na, paglande, pamakud.
Pero kasebian pin nung kabang mura ya
Yan painut-inut meng iyungyung keta,
Agawa meng tukud, parase garosa
O nanu mang buring maging kasilbia’na.
Pero potang iti milalu ne kasias
A kasing tibe ning payarung damulag,
Mabungle ne’t alang kaulyan a mayap
At ing maging bunga pait ampon salpak.
Antimo pin karing ngeni bayung sibul
A e king mayap a ugali miyungyung,
Yan agiang nanan meng aralan ken, pihung
Angga mu king ala yang bulad tututul.
Pablasang nanu mang bage e meyagap
Keng ikapuri ra ing bunga e mayap;
Yang labung malambut ya pa kabang anak,
Pero pangatua na, asero ya kabas.
Anak makanian la aske at pangimut
King panahun ngeni, at iti ing alus
A mimiral ampon mayayakit lubus
Karing penganak a alang matiribus!
Lalu na karing ken a e maniwala,
King kabang maranun agapan meng yulma
Ing metung a bage, bukas o makadua
Mamungang tagumpe ing banal a nasa.
Pero nung pabusten mu at e agapan
Ing kabang maranun saklu kang inuman,
Keng bilis ning oras, pihu kang malakuan
At ala na kang akua mekad kapatak man.
Ala nang muna ken king kabang maranun
Isadia mu ne ing gamitan mung tukung,
Yan anti mu naman keng kabang ing labung
Mura ya agapan king buring iyungyung!
