yatu pabakut ne, lelangan ning Guinu,
malagad ‘ting lululsut, king gabung tikpan mu,
susulapong ayup, bilyo’t miparayu,
‘la na kasing tangke, na keni tutuklu.
matas lang gusali, kapalit ding impun,
sable sableng kable, akwa pang mibuknul,
e man makasilip, aldo king maranun,
maski king albugan, kabud na dalumdum.
angin mang asagap, ating samut asuk,
mamandar lang saken, ainge king balugbug,
kanita kalesa, kabayung mangguyud,
karitun king baryu, gamit a pang-hakut.
masanting ba ini, o lalung malala?
metagin a labuad, pati na deng diwa,
uli ning panyulung, ning teknolohiya,
marakal ng bage, migbayu na’t sabla.
nanu ing mas mayap, napun nakadua na?
tutuki pang siglo, tau darakal pa,
mengabawas na ngan, g’yang naturalesa,
saskup ne ing yatu, pati pangisnawa.
