Ikayung bitis ku, e sana tutuknang
Anggang e miparas, kakung pupuntalan
Maski na makaba, sementadong dalan
Ali ko paynawa, g’yang penandit mu man.
Uling balu ku, nunti ya kalaut
Nasang kabiasnan, akua kung ayabut
Kapalian ning aldo, sobrang makarunut
Yang ayayagwanta, mas titibe ku lub.
Mura pa ing isip, kulang pa ing male
Eku sasaingsing, makanini ke bie
Misalitsalitan, kakung uniporme
Adua la mu kabud, akua dang maglare.
Sapin talampakan, metung mu kaparis
Mapupudpud na la, king kakakagamit
Mingat balang takbang, eku apambilis
Lakwas lang masira, nung bisang pulandit.
Bakal ku king bulsa, baryang kakalansing
Maralas ala pa, salamat nung atin
Maulaga kaku, Ma, ‘yang penabilin
Mimingat king dalan, mangading taimtim.
Mibait kalulu, ‘yang kakung tadjana
Metung ‘yang kasamak, pengari kung Tata
Misan kakapus pa, king pupul mibenta
Atin pang mañingil, kareng inutang da.
Mamilang pang banua, bayu ku miparas
Bala ng takbang ku, abilang deng bakas
Pag-asang panayan, daratang ing bukas
Sapin ku king bitis, ‘ting sulud ng medyas.
Ba’t ngeni maselan, deng anak magaral
Ating atad-sundu, t’yu la king atutan
Pati na king bakal, ela magkulangan
Pangayari da sa, agyu dang ablasan.
