(Kaugne na pa murin ning ‘Buwan ng Wika’ o ning Aldo ning Amanung Sisuan, deting aduang kawatasan Capampangan ila pamung ipalual mi para king malugud yung pamamasa).
MISAN a tinud ya keng STL i Piyuk,
Aisipan na ing Menila linuslus,
At karas na niti tambing yang tinaglus
King Escolta banting keni pa maglibut
At patunayan na king kayang sarili
Ing ya agyang ngeni ya pa minta keni,
Ding kayang kabaryu e re sawlan iti
Karas king e ra pa tikman king bie reti
Anti mo ing mengan keng class a restoran,
A nu’ orderan mu ing buri mung ulam;
Inya katulid na king Peninsula nyan,
Marapal yang linub ban keni ya mangan.
Oneng ing masulit, antining e sadya
Keng ‘menu’ o nanung buring ulaman na,
Magugumasid nya ketang orderan da
Ding aliwa, bayu morder para kaya.
Balang inorder da ding kayang kasiping,
Ya namang king weyter orderan nang tambing;
Angga king atin yang dimdam sinabing “shine,”
“Weyter” nganang niti, “ako’y bigyan mo rin”
(Usu pa kanita ing kabang mamangan
Ya’ing metung a Don kareng ngara ‘five star’
A restoran, ating ‘shoe shine boy’kang dasan,
Nung nu’ kareti malyari kang magpa-‘shine’).
“Hoy mama” ngana ning mekiduang kaniti,
“Bakit kung ano ang aking sinasabi
Ay siyang ginagaya mo lamang parati;
Ba’t di ka umorder ng ibang putahe?”
“Sir” ngana ning Piyuk, “huwag mong maliitin
Ang pagkatao ko pagkat kaya ko ring
Bayaran anumang gusto kong ulamin;
Ikaw lang bang sanay kumain d’yan ng ‘shine’?!”
Ing Sermun nang Ingkung
NUNG ngeni me pamu pilit babayutuk
Ing kuayan a binang mataram na suksuk,
Yan king pamalak mung agawa meng paud
E mu ne apande king buri mung alkus.
Angga mu king iti mabunglu ya kabud
Nung iti pilitan me pang ibaluktut,
Iti angga na king tumua ya’t makutud
Ing kapalyarian na paglande, pamakud.
Pero nung iti pin nyang kabang mura ya
Yan painut-inut meng inungyung keta,
Agawa meng paud, parase garosa
O nanu mang buri mung maging alkus na.
At iti maliaring maging gabe me pa
Paniatang ning aldo a magtukud na ka,
A nu’ makakua kang kakutud a sanga
Ning kuayan a ganap na kasyas at katua.
Makanyan mu naman king meto’ penganak
A e miyungyung king ugaling masampat,
Yang agiang nanan meng aralan keng mayap
Magkasakit na kang king ustu me yanad.
Pablasang nanu mang bage e meyagap
Angga mu king iti keng matsura miras;
Yang labung malambut ya pa kabang anak,
Pero pangatua na, asna ne king kasyas!
