detang anggang mapalad a kandidatung memanyambut;
sana naman ing tiwala a karela ra pigkalub
ding memalen – suklian deting serbisyung mipnu king lugud,
Ban keta ing parasan ding tapat at tune malugud
karing dapat deting suywan maging sakdal at tibubus.
Sana retang balu reting karela e memagbotu
den e ra la bebenggasan at lalatian pangatau;
Ipagkalub da naman sa ing matapat a serbisyu
bilang metung a memalen king dapat a makatau;
At e uling keka e ne pigkalub ing kayang botu,
e mia naman saupan potang mangailangan ya ing tau.
Ding miyalal pasibayu, maki asal a malabsâ
magbayu la sana reti, at dumine no mang bagyâ;
Ngening iti yang opisyal a obrang karen mitakda,
mangaintulid mu’ing gampanan deting alang pamagkunwa;
Lalu retang karing sesyon, e tinagun mang bitasâ
at ding sadiang manungkulan baski nanu alang gewâ
Nung e mu ing mamilang king taliri ra karing gamat
at nu’ pilan namung aldo, ing panan da bayu miras
ing sweldu at aliwa pang tatanggapan deti dapat
neng mapupus ya ing bulan, at ing awsan dang kinsenas;
Pero ing obligasyun den a sukat gampanan mayap,
keraklan mipaburen mu king kelan dang tune lingap.
At sana ding e mikalmang mipuk kaniang katungkulan
ibye da ing suporta ra karing bayung mengayalal;
Ing nasa rang mangasanting sana idake ra naman
para king ikasaplala ning mal tamung lalawigan;
Atyu king pamisanmetung ning nanu pa mang kimutan,
ing masampat a tagumpe at malagung kapanayan.
E ra sana pairalan ing karelang katasan lub
ban king panyulung ing balen lumakad yang matalustus;
Ing milalung pulitika a dalan na ning sigalut
kalingwan ya at kaniti e tamu sana paygapus;
Ing tagumpe e makakua keng sara-sariling kimut,
nu’ne iti keng masanting a pamitambayan lubus.
Misanmetung la ngan sana at ituklip ing milabas
sakali’t ding pusu reti menandaman la mang kaplas
karing pasaring a dakal at amanung mangaparas
a meyapse at meramdam karing dilang mangataras;
Iti karaniwan namu lalu karing e ra atanggap
ing deti e la mikalma king nasa ra at pigagap.
Uling nung ing kekang pake bilang meto’ pulitiku
king ikakayap ning balen ibye me ing sarili mu;
Mekad dakal la ring keka magtiwala ban magbotu
nung sakali keng tutuki tagal ka pang pasibayu;
Panapanahun mu abe ing bie keti babo yatu,
male mu keng 2019, ikang dalan da ring tau?
Karing mikalmang sinambut keng milabas a alalan,
anti keni ing kekayu pakisabi mi at aduan;
Sana, itang kapakanan niting balen ing isipan
at aliwa itang para king sariling kapakayan;
Itulid ya itang mali ketang napun a miralan
at ing dalan ning panyulung ing kekatang taluntunan…..
Marvel ‘Vhelle’ V. Garcia
San Simon, Pampanga
