BALAKU mo sana akung mekayalak
daka’la pala at e la mu bubulad
ding king poema a kanakung belangkas
at kaniti anti waring meki-angkas
Kapamilatan ku buri rang ipasiag
Iting maliliaring tutung makakamas;
at nung atin ku mang apingkil a sugat,
ipanupaya yu agiang sobra kaplas.
Deting sablang bage kakung taladtaran
tanggapan da’t ali, pawa lang katutuan
a makaparikil karing memanagal,
miniambut, mesambut kanitang alalan;
Ngeni, ala nalu, sinalikut no ngan,
pati alino ra, e mu na akit man;
e anti kanita, simpli mung inuman
o bertdey mung gulung e ra palampasan.
Kanitang panaun ning pamangampanya
maralas atilu agiang nukarin pa,
binyag, kasalan o magastus a fiesta
daratang la agiang e ro’ kinumbira;
Nung e man pera ing kekata yambag da,
mamitbit lang alak a maki-lagyu ra;
at nung den ala lang alak a darala,
karing tindahan ken, pasali la keka
Pero ngeni agiang karing ating mete
e no pupunta man banting makirame,
at e anti iniang tatagal la abe
agagawa reti ing makipaglame;
At detang korona a karelang babie
bilang panalala king meangu na bie,
king keraklan deti, nung nu’ ra la ike
e ra na balu man dening maki-bale.
Ngeni mo kumbiran king kekang okasyun
o kaya paralan sulat imbitasyun,
agiang numanu kang magbatbat king gabun
e mo ayasahan kusa lang tumagun;
Kase, yari na pin naman ing eleksiyun
e no’ paigastus at maniayang panaun,
ot e na la mu pin naman mo magdatun
karing bale ra o king SM lumuyun?
Aba, nung makanian, atin lang matulid
deting kekatamu, tatagal, lalapit
lakuas ketang oras, a lipit lang lipit,
a paniawad ta’lang saup ding masakit.
E ta’la pin pala, asisian nung bakit
karing kandidatu la makatilalid,
kanita ra la mu pin den apupusit
uling kaibat, metung man e ta’ne akit.
At neng malapit na mung mika-alalan
karin la lalto at pane daramdaman,
a patitingapun luluyun king dalan,
at antimo waring alang kapagalan;
Ita ing oras a mayan lang lapitan
at sobra ganaka karing mangailangan,
pero kabud mipuk la king katungkulan
yapin ing panaun na ning salikutan!
Vhelle V. Garcia
June 15, 2019
United Arab Emirates
