Kaniamanan ning tudtud ku babo ning garosang laun
Lalam nitang pun sampaluk a mebinang masalilung,
Mekabulad kabud namu dindam kung midadapitun
Ing alang kamunan-munan a paniatang nitang ayun;
At keta ing dane kaili ning Pampanga, medalumdum
King paitas a kule abung biga a mig-telapayung!
Ing bunduk ning Pinatubu a malwat nang e matatdas
Ya pala itang piyaglon da busal nitang alingasngas,
Kabang makabatio la ngan dane a nu’ itang ulap
Lahar pala ing samut na a susulpit atmung katas;
At kambe ning tikatik na ning uran a malapanas,
Mapilan mung minutu ita – king marangle linaganas.
King agia mang kaugtuan ning aldo ketang oras a ita,
Penandit mu meging pisak king mabilug a probinsya;
Inia naman pati saken a magbiahi keni’t keta
Memandal at memaglele karing rampa ning kalsada;
Uling itang labuk lahar a dagpa king arapan da
Kakapul king windshield deti’t penandit mu makapal na.
Mibalita karing radyu king ing balen ning Baculud,
Ya ing peka mas matinding mitambunan ketang labuk;
At waman king minuna nang panulandung nitang laput,
Ding aliwang baryu niti e la mepinsalang lubus,
Paniatang ning bagyung Mameng kanita la ganap limbug,
A’yantimo’ing Cabalantian a malalam pangakutkut!
E mu libung ektarya ing palayan a ta’na pete
Ning kinusad a mapaling lahar karin king marangle;
Nung inia ding ortelanu a sadiang mapayapa bie
At maratun mu bili king sariling pibale-bale,
Deti ilang peka-grabing miyapektuan a pagkabie
At ketang penandit a ita melubas king sablang bage.
Pinsalang maragul keta, keni’t karin ing miliari
Karing sibabalang balen a disan ning balas a iti,
Uling bista’t e lahar ing kinusad king sakup deti
Albug namang misnang dagul ing kimtan dang peka-grabi;
King aslagan – ing San Simon, ing Masantol, dane Mauli
At king Guagua at Sasmuan – itang peka-mas matindi.
Ing Angeles – king minunang bugsung datang na ning lahar,
Maragul a pinsala ing digpa king mesabing lugal;
Uling pelalung istasyun ning Rabbit king kabalenan,
Ikua nang alasak niti king balas a tigtug na nyan;
At maging ding tete batu a’yantimo ing Abacan,
Inayud namu naman ning masalusung danum uran.
Nanupata, kulang namung ing balen e ya melumpu
King pinsalang belasbas ning bulkan keti kekatamu;
Dapot uling matapat ta’ kapanaligan king Ginu,
At atin lang malasakit ding kekata gugubyernu,
Ing “Mega Dike” a pangambil king albug a lampas tau,
Megawa ya ban ing danum ilisya na kekatamu.
At ngening king dalisdis na niting masangil a bunduk
Ikua na nang menapnap ning mengasalalak nang labuk,
Datang man ing mangasikan a uran ken, e na kabud
Magus antimo ing sadia itang lahar a metudtud;
At pilan mang bagyu mekad ing keti bigla nang marug,
Dakal itang danum namu ing paindalan a mabaldug.
Uli niti, mapawi nang lubus ing memale sindak
King balayan kung tikusan na keta ning mailing abak
Inia naman ngening ala neng musing ning kalamidad,
Memanuli no’ ring dakal ban ken manuknangan ganap
Pablasang paniwalan dang kagulutan nitang ulap
Atyu karin ing masalang Aldo makasadiang sunlag.
