Itong sa NAIA ngayon nangyayaring
Serye nitong halos araw-araw nating
Nababalitaan na patuloy pa ring
May nahuhulihan ng bala ng baril,
Ya’y di nalalayo sa suspetsa natin;
Na maaring tunay ngang may umiiral
Diyan sa NAIA sa kasalukuyan
Na isang klase ng ‘syndicate or scam’
Kaya’t patuloy pang may pasahero riyang
Nadarakip at yan at yan kinakasuhan
Ng ‘illegal possession’ ng bagay na bawal;
Sa nakararami ay di na rin lingid
Itong kung ilan na ang mga nadakip
Na mga biktima o ‘airline passengers,’
Nang dahil sa bintang at tangkang pagpuslit
Ng ‘live ammunition’, ikaw ba ay pilit
Na magdadala pa, tulad ng nabanggit?
Sa puntong yan mga kawawang biktima
Ng nasabing ‘scam’diyan sa NAIA
Ang posibleng dahil sa ganyang sistema
Ay nasisira ang moralidad nila,
Pagkat nang dahil nga sa “laglag-bala”
Pati inosente damay palagi na.
Di ko tinitiyak na mga empleado
Sa pambansang Aiport na Ninoy Aquino
Ang may gawa riyan ng sistemang ganito,
Pero ano’t sa Clark wala kami nito?
At ni minsan yata wala pang natiklo
O nakitaan man lang ng basyo rito.
Di tulad sa NAIA na ang ‘laglag-bala’
Ay karaniwan na lamang ding eksena
Sa araw-araw na operasyon nila,
Nang dahil marahil higit malamang na
Ilang ‘porters’ mismo ang may kakutsaba
Yatang Screeners d’yan na taga-rikisa?
Kung saan sa ganang ating pang-sariling
Matamang pagsuri r’yan ng insidenteng
Ang nahulihan ay babae pa mandin,
At itong biktima ay may edad na rin,
Sa akala kaya nati’y papatusin
Ng nakatatanda ang ganyang gawain?
Lalo pa’t base sa naging pahayag niya
Ay napilitan lang na bumiyahe siya
Para dumalo sa napakahalaga’ng
Okasyon kung saan ang apo, kakanta
At lubhang ispesyal ang kanyang presensya
Kaya di maaring siya’y di pumunta;
Ngunit nang dahil lang sa siya’y nakitaan
Ng umano’y bala sa dala-dalaan,
Imbes makalipad sa patutunguan,
Katakut-takut na imbestigasyon diyan
Ang dinanas nitong biktimang naturan
At di nakaalis – sapagkat naharang!
Ano kaya hangga’t ganyan ang situasyon
Sa NAIA, at ang iba’y takot ngayong
Bumiyahe at diyan sumakay pa-Hongkong,
Narita, Canada, Australia, Singapore,
Sa State, sa Dubai, sa Paris at London,
Sa CIAC ng Angeles, dapat pumaroon.
At dito sumakay saan man papunta,
Sapagkat sa Clark ay walang ‘laglag-bala’
Na kagaya ngayon nitong sa NAIA,
Kung saan posibleng ma-Muntinlupa ka;
Pero sa CIAC o Clark ay ginagarantya
Ng pamunuan ang sa lahat ligtas ka!
