Inyang anak-anak pa ing keyang bili
At ala ya metung mang buwak a maputi,
Kanita – king agyang ala yang salapi
Dakal a babaing keya makiburi.
Pablasang ing santing na ala-Adonis,
Matikmus ya arung, e pa mangaliskis
Ing balat nang anti waring baluk mais
King kagaspang ngeni, mepanat nang kutis.
Metung man ala nang papakit ganaka
Karing keya ila pang lalapit kusa;
E na kalupa nyang katalasan ya pa
At nu’ keya dakal a kinayat wawa.
Dakal a sininta king tagle nang tikas
A ngeni pin anting melaun, kinupas,
Inya kemaulyan itang pagparagas
Na kanita, oyan paninap nang lubas.
Ding akaiskwela na at akayagnan
Mig-graduate high school tituladu no’ngan
Kabang ya uli ning sobrang kayabangan
Yan mang migkolehiyo’ e na niti disan.
Makanano, agyang pepagaral de iti
Ding pakakalulu a keyang pengari,
E na pigsikapan, inya ing milyari
Kabigwan ing keyang kimtan bandang tawli.
At uli ning e na bitasang sikasu
Ing kapagnasan dang magyari yang kursu,
Malagung tagimpan deti meging abu,
At e mipabilang karing tituladu.
Pasari ning e ya taganang migsikap
Para king sarili niting ikakayap,
Nya kabaligtaran king kaya paninap
Ning Ima, ing keng bie niti pagparagas.
At ngeni, wayta pin imbes malagung bie
Ing kimtan niti keng pangangas nang pane,
Ing ya king bitbit nang sintingan akua ne
Keynan ing babai king birtud nang tagle.
A nu’ing kemaulian na pin bandang tauli,
Ning ya pibuburyan de’yti ring babai,
E ya man maglolo – ing sintingan a iti,
Yang ntimurin ing maging paduas niti.
At nung makananung makakua yang Eba,
A malagu ampo pang dakal a pera,
Angga king meynip ya keng kapapanya
At ikua nang ketubasan ning santing na.
At keta ing dapat na sanang pupulan
A mayumung bunga, ning keyang sintingan
At e na ukulan ating aldo datang
Kumupas at laun, mirinan angganan.
At ngening kapilan ya lalbug ing aldo
Karin ne agwantan ban ibalik babo?
Nanu mang mibakung a laman ning silyo,
Ing kararasan na – muli mu king kanyo!
Pablasang nanu mang bage mipabusten
Muli mu king ala ngang kamasalesen
Kenu mang pati na king sarili da ren,
King ikakayap dang e ra agyung sesen.
E na sukat ipa-ngangas ning ninuman
Ing anggang masanting king bie na, atyu ngan;
Kase, nanu pa mang bage king sikluban
Maki-takdang aldo niting kapupusan.
(Ah, ing tau pala e yamu mibait
Ban kaibat mate ya king alang alingit;
At nung yan ala yang matinung pepakit,
Nanung king pusu ring aliwa midukit?)
