itang nung nanu ing katutubung Sabi
king metung a lugal…alimbawa keti
kekata Pampanga yang magamit iti
Antimong ngara pin ‘medium of instruction’
(umpisa king Grade 1 angga yatang Grade IV)
ban ding anak tamu malagua ra kanung
aintindian deti ing karelang lisyun
Wa tutu, lakuas dang malaguang abalu
ing lisyun deti nung sabing katutubu
a kemulatan da’t sinusu kang Indu
itang king iskwela muna rang ituru
Dapot ing problema inggil king bage yan
ninu ring ‘teacher’ a kekatang paturuan?
At kenu la libru ding sukat pamasan
ding anak a reti ngening salukuyan?
Malagad la pang keng ilo ning abias ken
ding ‘school teacher’ a kekatang kabalen
a sane antimong ‘mother tongue speaker,’
inya magkasakit tang’ manintun karen.
Uli ning atin mang medyu biasang bagya
o makibalu keng tamak a salita,
ing ‘pin’, akalinguan da ne ring aliwa,
uli ning kareti mialilan yang ‘nga’.
Ing Sabing ‘e wari’ ala nia mu naman
king bokabularyo ding alus keraklan,
nune ‘di ba’ ngara (kabang ing katutuan)
ala tang salitang ‘ba’ keng Kapampangan.
E king aku tantu ku pung magbibiasa
partikular inggil king Salitang mana,
Pero keng Sabi at sariling kultura
mas dakal la balu ring bait poeta.
E anting insultu karing ken mengangas
sinulat king librung pepalual na’t sukat
ning DepEd, ing laman na makapanilak,
At ding ‘grammar’ da e la mikakatulpak.
Alang matsura keng nasa nang isulung
ning DepEd, pero ing bage manayun
agpang king kekaming sariling opinyun,
ding anak e la king masanting mituntun.
At imbes abalu re ing tune ustu
o makatud inggil king Salita tamu,
mekad masalaula yamu ing Amanu
karing panwalan na ken ning DepEd mismu.
Nung tutung ing ‘Department of Education’
seryosu ya inggil king paksang susulung,
Oreni ring keti king ‘Pampanga region’
ding malyaring kekatang apagmaragul
A posibleng akua ban mantabe turu
karing pasadu ken bilang talaturu,
pero king Salita tamung katutubu
e sapat ing bage karelang abalu.
Y Amado Gigante ning Angeles city,
Francisco Guinto ning balen Macabebe,
Pol Batac, Kate Lapuz at dane Mauli
dakal la; king Lubao, y Poeta Jaspe.
At dakal pang ken a malyaring pikunan,
karing larino keng Sabing Kapampangan,
a e tamu pikarine paturuanan
sakali’t burian da ring maingaintuliran!
