KAGABI, habang ako ay nagsusulat
ng ‘script’ para sa pang-tanghalang labas
na ‘sideline’ ko bilang isang manunulat,
‘an unexpected call makes my silence disturbed’
At ang pambungad na bati, “Mr. Garcia?”
“Yes, speaking” I said, “hello, sino sila?”
“Isa sa masugid mong reader”, aniya;
“Anong maipaglingkod ko po sa kanila?”
“Galit yata kayo kay Senador Lapid?”
“Hindi sir, ba’t naman ako magagalit?”
“Nabasa ko ang kolum nyo nitong Lunes,
na sa kanya’y medyo may halong pilantik”
Ang sagot ko, hindi at ako ay walang
personal na galit sa taong naturan;
kundi ang akin ay kuro-kuro lamang
at di paninira sa kanyang pangalan.
Matapos masagot ang iba pang tanong,
ang mama ay kusang nagbaba ng celpon,
at ni hindi ko na nakuhang itanong
sa kanya kung taga saan ang taong ‘yon.
At kung tumagal ang aming pag-uusap,
lalo’t kung personal kaming nagkaharap,
ganito marahil sa taong tumawag
ang katanungan na aking idadagdag:
Sa 12 years na pagka-upo ng mag-ama
bilang gobernador ng ating probinsya,
may maituturo po ba kaya sila
na nagawa para dito sa Pampanga?
Kung sila ma’y walang ginawang masama
ay wala rin yatang magandang ginawa,
liban nang pumutok ang bulkan ng bigla,
ang matandang Lapid nag-‘Stuntman’ yata
Nang sa helicopter ito’y naglambitin
upang ang isang matanda ay sagipin
sa kumukulong lahar na paparating,
na tiyakang ikasawi kung anurin.
Pero pinsala man itong idinulot
ng Mt. Pinatubo nang ito’y pumutok,
malaking kuarta rin itong ipinasok
kung nabantayan at nalagay sa ayos
Ang proseso’t mga tamang pamalakad
nang sila itong sa Capitol may hawak,
kaya lang dahil sa parehong masipag
sa pagliban n’yan sa pasok nila dapat
Sa tanggapan nila nang panahong iyon
ay di nila syempre lubos ma-monitor
kung ‘200 thousand’ lang o isang milyon
ang kita sa ‘quarry’ sa buong maghapon.
Di ko sinasabing posibleng kinupit
ng kahit sino o ng mag-amang Lapid
ang kita sa lahar – pero ano’t higit
nang si Gob Panlilio ang kay Mark pumalit?
Mantakin mo namang ang ‘one month collection’
nang sina Lapid ang nandiyan sa Capitol
ay kita para sa ‘one day’ lamang noon
ng naging popular na ‘priest-turned-governor’
At lalong lumaki yata ang koleksyon
sa naturang mina ng probinsya ngayon
nitong si “Nanay” ang naging Gobernador
bilang kahalili ng ating si Among.
Sa puntong nasabi ano ang dahilan
kung bakit palipat-lipat ng tirahan
si Lito Lapid kung di sa pagnanasang
manatili siya na may katungkulan?
(At Angeles city ang target ngayon niyan
Matapos niyang sa Makati sumemplang?!)
