Sa ulat na nakarating sa tanggapan ni Zambales Provincial Police Office, Director, P/Sr. Supt. Rolando Felix, kinilala ang biktimang si Retired 2nd Lt. Alfredo Barela Rebulado, at head security officer at Bantay Dagat Volunteer sa Zambales at Pangasinan.
Sa paunang imbestigasyon ng pulisya nasa kasarapan ng tulog ang biktima dakong alas-2 ng madaling araw sa loob ng kanyang bunk house nang magising ito sa kahol ng kanyang aso at nang lumabas ng bahay para tingnan ito ay sinalubong ng magkakasunod na putok ng baril.
Ayon sa ulat, bago naganap ang pamamaril may hinuling mga illegal na mangingisda ang biktima sa sakop ng isla.
Batay sa isinagawang eksaminasyon ng scene of the crime operatives ang biktima ay nagtamo ng pitong tama ng bala mula sa M-16 armalite rifle sa ulo at iba pang bahagi ng kanyang katawan na kaagad nitong ikinasawi.
Nakuha sa loob ng bahay ng biktima ang ibat-ibang klase ng baril at bala tulad ng isang M-14 US riffle, magazine assembly, 92 bala ng caliber 60 machinegun, caliber 45 pistol at wallet na naglalaman ng pera na nagkakahalaga ng P1,746.
Patuloy pang nagsasagawa ng imbestigasyon ang pulisya para matukoy ang suspek na responsable sa pagpatay.
