King balen ning San Luis, dekada sisenta
Tinagal alkalde, pangane ming Koya
Mura pa ing isip, kaya deng mumusga
Kanitang milabas, lalaban deng matua
Deng aliwang buri, iyabe king linya
Lalapitan me pa, tantya mu e bisa
Pamilitmilitan, pane ing tanggi na
Marine nang sabyan, ala yang ganasya
Sweldu mu kapurit, dagdag pamasaje
Nung manganak kasal, kulang pa ing ibie
Misan pabulan pa, gagawang kumpare
E balu nung malas, o ika maswerte
Taung kandidatu, lutu ya ing pusad
King pamangampanya, pane nang lalakad
Saken mung karitun, kalesang kakarag
Nune e malikabuk, dalan yang maburak
Nung dasan ning bengi, ika makitudtud
Uling ning peligru, magbalik malaut
Kuryente ala pa, lalung makatakut
Panan na ing bukas, muli ng malaus
E dakal ing gastus, nung misan ala man
Ala kang bubulug, kareng pupuntalan
Adya lang pamangan, atin pang inuman
Karela dengalan, na ila detangan
Amanuan dang lider, “matanda sa nayon”,
Ila ding dungutan, mengaring paglolon
Nung abuburi da, ing kekang intensyon
Boto lang marakal, na keka idaon
Pati rin deng kilwal, ating makikialam
Pakisabing mayap, ‘tin lang mamanukan
Kailangang maagap, dapat pakisabyan
Aliwang botante, ila deng tutukyan
Tatagal kanita, taung maprinsipyu
Pananagalan da, tutu mung serbisyu
E la man mikwalta, nune mangalulu
Pati na ing bie da, atyu king peligru
Ba, ngeni, bayu na, iting pulitika
Mimisip nong agad, deng akwa dang pera
Mamuhunang dakal, para sumambut la
Mayan nang bumawi, pag makalukluk na
N’ya ing Pilipinas, ala yang progresu
Kabang manako la, dapung pulitiku
Deng bayung lulukluk, agad lang mitutu
Misan ing gobyernu, iyang mituturu
Kadalasan ngeni, pasalwan d’yang baguk
Buri na miabe, lagyu na ipalub
Ala ne mang gewa, nyang iya sinambut
Kabalitan ne mang, maklak ya ing buntuk
Alang kamag-anak, o kakaluguran
Basta ing iboto, kaya ating nabang
Subliang kandila, magkumpareng banal
Uling mikawani, king metung a dalan
Ala ng Salonga, Recto ning Batangas
Lorenzo Tañada, Ninoy at Katigbak
Alus artista la, kulang pa king talas
Makananung gawa, masanting a batas
Migising pa kaya, king panga-bangungut
Kapilan malyari, alang makatalus
Nung magsilbi sana, tulid ing baluktut
Maski na masakit, nung ating mapaklud.
(Poesia yang mesulat ban deng mipanganak dekada sitenta patas, ing lakad ning pulitika kanitang minunang panaun).
